Ө.Яшүкірқызын көзқарақты қауым ақын, жазушы, сатирик, журналист ретінде жақсы біледі. Төрт жанрды еркін меңгерген оның қай шығармасы да шынайылығымен, тазалығымен тартымды. Әсіресе қазақы бояуға толы кестелі тілі оқырманды жетелеп әкетеді.
Кешті ақын, Қазақстан Жазушылар одағы Астана қалалық филиалының директоры Дәулеткерей Кәпұлы жүргізді. Алдымен жиын модераторы кеш иесіне Қазақстан Жазушылар одағының басқарма төрағасы М.Құлкеновтің құттықтаухатын оқып, қаламгерге «Қазақстанның құрметті жазушысы» төсбелгісін табыс етті.
Одан кейін сөз алған жазушы, Мемлекеттік сыйлықтың лауреаты Әлібек Асқар бүгінгі қуаныш иесі Ө.Яшүкірқызымен мемлекеттік қызметте бірге істеген жылдарынан естелік айтты. «Жазушылық пен мемлекеттік қызметтің арасы екі бөлек. Екі әлем десе болады. Өріс біздің департаментке газеттен келді. Еркін. Жадырап күледі. Ойын жасырмайды. Ал мемлекеттік қызметте жүргендердің дені ондай емес. Ешқашан пікірін айтпайды. Бүгіп жүреді. Бір күні Өрісті шақырып алып, ойыңызды ашық айта бермеңіз дедім. Оны бұл кісі елеген жоқ. Сол қалпынан өзгермеді. Мемлекеттік қызметтің ортасына кейде еркіндік те керек. Мен соны Өрістің бойынан көрдім», деді ол. Жазушы Шәрбану Бейсенова Ө.Яшүкірқызымен Астанаға келгенде алғаш танысқанын сөз етті.
«1998 жылы елордаға көшіп келгенде, Өріс «Астана ақшамы» газетінде істеді. Алғашында осында кім бар екен деп ойладым. Сонда алғаш танысқаным: өлкетанушы Клара Әмірқызы мен Өріс болды. Өрекеңнің газеттен әрбір мақаласын сүйсініп оқушы едім. Әсіресе «Баған басында жанған жігіт» туралы әлеуметтік мақаласы оқырмандарды дүр сілкіндірген еді. Оның жазбаларында адамгершілік, әділеттілік жағы басым болатын», деп ізгі лебізін білдірді.
Ал Қазақстан Жазушылар одағының мүшесі, ақын Егеухан Мұқамәдиқызы қаламгердің төрт томдығын толық оқып шыққанын айтып, автордың көркем сөз өнеріндегі жанкешті еңбегін жоғары бағалады. Жазушы, аудармашы Камал Әлпейісова Ө.Яшүкірқызының шығармашылығы туралы айта келіп: «Мен елден ерте Алматыға кетіп, туған жерімнен алыстап қалдым. Сондықтан туған еліме қызмет еткен адамдарды жақсы көремін. Өрекең Мұхит аға екеуі бұрынғы Торғай облысына барып еңбек етті. Мұхит ағаның басқаруымен Торғай өңіріндегі 31 ауылда әуежай ашылды. Содан мен де еліме қызмет еткен адамдарды айтып жүрейін, жазып жүрейін деген ішкі ой болды. Оған «Қазақ әдебиеті» газетінде жарық көрген Ө.Яшүкірқызы туралы мақаламда кеңірек тоқталдым», деді К. Әбілқасымқызы.
Сондай-ақ кеш барысында қаламгердің шығармашылығы мен адами келбеті жайында Жолтай Әлмашұлы, Оңдасын Елубай, Камал Әбдірахман, Толымбек Әбдірайым, Айгүл Кемелбаева секілді жазушылар парасатты ой сабақтады. Автордың төрт томдық жинағының лентасы қиылды. Кеш соңында Ө.Яшүкірқызы жиналған қауымға ризашылығын білдірді.
