Сол сияқты Покровка, Новоникольск ауылдарының түбіндегі деңгей де төмен түсе бастаған. Ресеймен екі ортада орналасқан Долматов аулындағы Есілдің деңгейі 11 см-ге төмендеген. Петропавл су қоймасында Есілдің деңгейі 28 см-ге түсіп, 16 сәуірде болған 12 метрден асқан биіктіктен құлдырап, қазір 10,8 метрдің маңайына түсті.
Қазір негізгі күш тасқынның зардабын жоюға жұмылдырылған. Су басқан үйлердің суын автобөшкелерге сорғызып, далаға тасудың жұмыстары қызу жүргізіліп жатыр. Зардап шегушілерге арналып облыс аумағында 500 үй салынады. Су басқан Ойқала, Тері зауыты, Тепличный шағын аудандарына барған өңір әкімі Ғауез Нұрмұхамбетов үйлері құлаудың аз-ақ алдында қалған тұрғындарға жаңадан үй салынатынын айтты. Қазір бұл аудандарда механикалық бригадалар қалпына келтіруге болмайды деп бағаланған үйлерді сүріп, орындарын тазалап жатыр.
Қазір қаланың «Солнечный-2» шағын ауданында «Қазақстан халқына» қорының бөлген қаражатына 100 үйдің құрылысы басталып кетті. Сонымен қатар осы жерге «Kaspi» АҚ – 300 үй, «Kazakhmys» корпорациясы 100 үй тұрғызбақшы. Оны салушы жергілікті 10 құрылыс компаниялары да белгіленген. «Бұл – орасан зор жұмыс. Алайда біз алдымыздағы жылыту маусымы басталғанша зардап шеккендерді жылы үйлерге кіргізуіміз керек», деді облыс әкімі.
Судан зардап шеккен шағын аудандардың бірі – «Заречный». Бұл ауданның тұрғындары да тегіс эвакуацияланған еді. Мұндағы бас бостандығынан айырылған ерлер мен әйелдер зоналары да көшірілген. Жуырда осы ауданның тұрғындарымен қала әкімі Серік Мұхамедиев кездесіп, көптеген мәселенің мән-жайына қанықты. Осындағы саяжайлардың бірінде тұрып келген Ақмарал Рүстемова биыл саяжайдағы үйін кеңейтіп, екі бөлме қоспақшы болған екен. Қажетті материалдарды алып та қойған. Бірақ соның бәрі суда қалыпты. Енді ол осындай саяжайда тұрғандарға үй беру қарастырылмағанын айтып шағымданды. Бұған қала әкімінің ондайларға жауабы қысқа болды. «Мұндай мәселелерді сот арқылы шешу керек. Егер сотқа баспанасыз қалғандарыңызды дәлелдесеңіздер және сот үй беру туралы шешім шығарса, біз тұрғын үймен қамтамасыз етуге міндеттіміз», деді ол.
Жұрттың бәрі зардап шеккендерге болысып, көмектесіп жатқанда алаяқтар да сұмпайы қылықтарын қоймайды. Жуырда жергілікті чаттардың біріне шетелдік нөмірмен пост жариялаған бір алаяқ зардап шеккен тұрғындарға 5 млн теңге алып бере алатынын хабарлап, сілтемесін көрсетіпті. Полиция бұған дер кезінде мән беріп, арнаулы құралдармен тексеріп, сілтемеге кірген адамның деректері алаяқтың қолына түсетінін және телефонына вирус кіретінін анықтады. Алаяқ бұл деректерді пайдаланып, несие ресімдеуі мүмкін екен. Сондықтан мұндай келеңсіздіктен барынша абай болған жөн.
Солтүстік Қазақстан облысы
