Өңіріміздің ең мықты балуаны атағын жеңіп алу және «Қазақстан барысы» республикалық турнирінде Солтүстік Қазақстан облысының намысын қорғауға қатысу үшін 32 үздік спортшы сайысқа түсті. Кең сарайдың көрермендер орны да лықа толған. Жұрттың бәріне алыптардың айқасы қызық көрінеді.
Солтүстік Қазақстан облысы дене шынықтыру және спорт басқармасы баспасөз қызметінің мәліметіне қарағанда, «Қазақстан барысы» республикалық турнирінің өңірлік кезеңіне барлық аудан белсенді қатысып, өз балуандарын шығарған. Бұл жарыста салмағы 95 килодан жоғары түйе балуандар күресетіні белгілі. Алып тұлғалы жігіттер облыстың 13 ауданы мен Петропавл қаласынан іріктеліп келіпті. Көрермендерді риза қылып қазақша іштен, сырттан шалып түсірудің әдістерін жетік меңгергендер шу дегеннен алға түсті.
Финалда Қызылжар ауданының жас балуаны Әділет Мырзаш пен Уәлиханов ауданының тумасы, турнирдің бірнеше дүркін жеңімпазы Алтынбек Аусағитов кездесті. Бұл жерде жастың күші мен тіс қаққан балуанның тәжірибесі сынға түскендей болды. Қызылжар ауданының балуаны «Қызылжар барысы» турниріне алғаш рет қатысып отыр. Оның жасы небәрі – 18-де ғана. Қара күші көп болғанымен әдіс-айласы жетіспей жатқаны көрініп тұр. Ал Уәлиханов ауданының өкілі бұл жарысқа бірнеше рет қатысқан, әрі тәжірибелі, әрі күрес әдістерін жетік меңгерген шебер. Көрерменнің ішін тартқызып қызықтырған күресте озық тәжірибе озып, Алтынбек Аусағитов бұл жолы да жеңіске жетті. Енді ол республикалық «Қазақстан барысы» турнирінде Қызылжар өңірінің намысын қорғайтын болды.
Сөйтіп, бас бәйгеге тігілген 500 мың теңгені Алтынбек Аусағитов еншіледі. Ал жас балуан Әділет Мырзаш 300 мың теңгенің бәйгесін алса, қола жүлдегер Шал ақын ауданының балуаны Батырхан Қайырбекке 200 мың теңгенің сертификаты бұйырды.
Солтүстік Қазақстан облысы
