М.Әзілханов сондай-ақ жалпыұлттық бірлік пен қоғамдық келісімді сақтау жолындағы табысты еңбектері үшін шымкенттік ассамблея мүшелеріне алғыс айтып, этносаясат аясында бірлесе атқарар жоба-жоспарлар жайында баяндады. Елдегі татулықты көздің қарашығындай қорғау әрі нығайту – мемлекеттік саясаттың маңызды бөлігі екенін атап өтті.
«Президент Қасым-Жомарт Тоқаев ауқымды жұмыстың негізгі бағыт-бағдарын айқындап берді. Ұлттық құрылтайдың үшінші отырысында айтылған құндылықтарды іске асыруда Ассамблеяның зор әлеуетін тиімді пайдалануды жүктеді. Әлемдік ахуал күрделеніп тұрғанда «жұрт болып жұмылып, ұлт болып ұйысу» керектігін нықтап шегеледі», деді ол.
Сессияда шаһар басшысы, қалалық ҚХА төрағасы Ғабит Сыздықбеков идеология хақында Мемлекет басшысының берген тапсырмаларын мегаполисте іске асыру жайын пысықтап, талқылап, алдағы жұмыстарды жүйелейтінін жеткізді. Президент жүктеген міндеттердің ішінде қала әкімі Ассамблея жұмысын еліміздің жаңа гуманитарлық идеологиялық доктринасымен үйлестіру, институционалдық әлеуетін нығайту секілді мәселелерге ерекше тоқталды. Мегаполис басшысы аталған міндеттер аясында туындайтын кешенді жұмыстарды атқаруға тек Ассамблея емес, қалалық деңгейдегі басқармалар, аудан әкімдері, оқу орындары, жастар ұйымдары мен азаматтық қоғам институттарының әлеуеті толық қолданылатынын айтты. Қоғамда Ассамблеяға қатысты түрлі пікір айтылып жүргенін жоққа шығармаған қала басшысы: «Халқымыздың бірлігін нығайтуға қызмет ететін бірегей институт ретінде елімізде мекен ететін барша этносты бір арнаға ұйыстырып отырған осы Ассамблея. Сондықтан ұйым аясында жүргізілген мемлекеттік этносаясаттың нәтижесінде қоғамда тұрақтылық пен этносаралық татулық берік орнады», деді. Әкім өз баяндамасында биыл көктемгі тасқын селден зардап шеккен солтүстік, батыс аймақтардағы тұрғындарға қолұшын созу үшін Ассамблея 1500 тоннадан астам азық-түлік пен ең қажетті заттар жөнелткенін, оның ішінде шымкенттік этномәдени бірлестіктердің үлесі 120 тонна гуманитарлық көмекті құрағанын атап өтті. «Су тасқыны кезінде ел бірлігі іс жүзінде көрінді. Қиналған жұртшылыққа халқымыз жұмыла көмек берді. Бұл жағдай бірлігімізді бекемдеп, ішкі татулықтың өз тұғырында екенін дәлелдеді», деді ол.
Жиында сондай-ақ қалалық Ассамблея төрағасының жаңа орынбасарлары тағайындалды. Ұйымның жанындағы кеңестің ұсынысымен Тахирбек Нишанбаев пен Тимур Казмин осы қызметке таңдап алынды. Жиында сонымен бірге Ж.Тәшенев атындағы университеттің проректоры Ғалымжан Битұрсын, Қазақстан өзбектері этномәдени бірлестіктері «Дустлик» қауымдастығының төрағасы Икрамжан Хашимжанов, Шымкент қаласының ACCESS бітірушілері «ASAA» жастар қоғамдық бірлестігінің жетекшісі, белсенді волонтер Данара Саранова, Шымкент қалалық мәслихатының депутаты Асхат Нұрлыбаев, «Ассамблея жастары» ұйымы қалалық өкілдігінің белсендісі Тимур Инкижино сөз сөйлеп, ұсыныс-пікірлерін ортаға салды.
Мәселен Ғ.Битұрсын этнос жастары арасында парасатты, адал азаматтарды тәрбиелеуге баса мән беру керектігіне тоқталды. Сондай-ақ ол Президент Ұлттық құрылтайда атап өткен жастарды бұзатын бес кеселмен күресу үшін бес негізгі міндетті орындау керектігін алға тартты. Олар атап айтқанда жастардың құқықтық, қаржылық, діни сауатын арттыру, жастарды ғылым мен өнерге, спортқа баулып өсіру. Этностар арасында конституциялық теңдік қағидатын дәріптеу. Өсіп келе жатқан жасты қосымша тіл білуге, салт-дәстүрді жетік меңгеруге тәрбиелеу. Соңғысы жастарды құрайтын этнос өкілдері арасында шынайы татулық пен достықты қалыптастыру. Спикердің айтуынша, бұлар ғаламдық жаһандану үдерісіне өскелең ұрпақтың жұтылып кетпеуі үшін керек.
И.Хашимжанов өзбек этномәдени бірлестігінің атқарған жұмысына тоқталды. «Ежелден туыстас қазақ пен өзбек жұрты Тұранды мекен етіп, қиыншылықты да, қуанышты да бірге көрді. Бауырлас халықтар іргелес жатқан көрші ғана емес, етжақын ағайын халық. Біздің тарихи тағдырымыз да, арман-мұратымыз да ортақ. Туыстығымыз тіл жақындығынан тамыр тартып, дәстүрімізбен жалғасып, салт-санамызбен қабысып келеді», деген ол екі ел арасындағы стратегиялық әріптестік осыдан 31 жыл бұрын Ордабасыдағы елдік жиында қабылданған «Мәңгілік достық туралы» келісіммен нықталғанын айтты.
И.Хашимжановтың айтуынша, дастарқан киелі ұғым, берекенің бастауы. Осы мәдениеттің өзегі болған құндылықты дәріптеу бағытында «Дустлик» қауымдастығы 13 жылдан бері «Достық дастарқаны» жобасын іске асырып келеді. 2022 жылдан бастап «Шымкент палауы» деген атқа ауысқан жобаның мақсаты – ас ішіп, ыдыс босату емес, елдегі бірлік пен достықтың көрінісін гастрофестиваль арқылы насихаттау.
Сессия соңында ҚХА төрағасының орынбасары бірқатар белсенді азаматты Ассамблея наградаларымен марапаттады. Айта кетейік, бүгінде қалалық ҚХА жанында 17 этномәдени бірлестік пен 7 құрылым қоғамдық қазақстандық патриотизмді дәріптеу бағытындағы жобаларға жұмылдырылған.
ШЫМКЕНТ
