Фото: А.Байжұманов
«Ғылым және технологиялық саясат туралы» заң және оған ілеспе «ҚР-ның кейбір заңнамалық актілеріне ғылым және технологиялық саясат, платформалық жұмыспен қамту және мемлекеттік бақылау мәселелері бойынша өзгерістер мен толықтырулар енгізу туралы» заң ғылымды дамытуға қолайлы жағдай жасауды және еліміздің бәсекеге қабілеттілігін қамтамасыз етуде ғылыми жетістіктердің нәтижесін енгізу үшін технологиялық саясатты жүзеге асыруды, ғылымды дамытудағы негізгі бағыттар мен ұстанымдарды, ғылыми және ғылыми-техникалық қызмет субъектілерін мемлекеттік қолдау тетіктерін айқындауды көздейді. Заңдарда ұлттық ғылым жүйесін дамыту тетіктері бар, ғылыми қызмет субъектілері, олардың құқықтары белгіленген. Ұлттық ғылым академиясының құқықтық мәртебесі, Ғылым қорының қызметі және ғылыми қызметті қаржыландыру тетіктері де бекітіледі.
Парламентшілер «Салық және бюджетке төленетін басқа да міндетті төлемдер туралы» Қазақстан Республикасының Кодексіне (Салық кодексі) және «Салық және бюджетке төленетін басқа да міндетті төлемдер туралы» ҚР-ның Кодексін (Салық кодексі) қолданысқа енгізу туралы» ҚР-ның Заңына өзгерістер мен толықтырулар енгізу туралы» ҚР-ның заңын да қарады. Заңның міндеті ғылымды дамыту үшін қолайлы жағдайлар жасау және кәсіпкерлік субъектілерін ғылыми және инновациялық қызметке тарту, ғылыми-зерттеу, ғылыми-техникалық және тәжірибелік-конструкторлық жұмыстарға жеке инвестиция салу үшін салықтық және инвестициялық преференциялар беру болып табылады.
Сенаторлардың айтуынша, заңдарды қабылдау ғылымның еліміз экономикасына қосатын үлесіне оң әсер етеді және ғылыми әлеуеттің бәсекеге қабілеттілігін арттырады.
Комитет мүшелері талқылау қорытындысы бойынша заңдарды Палата отырысында қарауға жіберу туралы шешім қабылдады.
