Жайық жағасында су деңгейін бақылап тұрған кезекші құрам таңғы 4 шамасында бөгеттің бір бөлігін су шайып, құлап жатқанын байқаған.
«Біз ТЖ мамандарымен бірігіп, бөгетті жедел түрде нығайту жұмысына кірісіп кеттік. Қазіргі уақытта бұл жерге геомембрана төсеп, қосымша топырақ төгіп жатырмыз. Ағыстың күшімен шайылған бөгеттің аумағы 100 м құрайды. Жалпы су шайған бөгет аумағын шифер жабындық материалымен қорғаймыз деген жоспарымыз болды. Алайда, су деңгейінің тереңдігі кедергі келтірді», дейді 69-73 участок координаторы Қаһарман Рахметұлы.
Жедел жұмысқа Ақтау ТЖД қызметкерлері мен атыраулық 20-ға жуық ТЖД маманы жұмылдырылды.
Спикердің айтуынша, құлаған бөгетті қалыпқа келтіру 90%-ға аяқталды. Нығайту жұмыстары жалғасып жатыр.
