«Таза Қазақстан» • 15 Маусым, 2024

Экология фестивалі

49 рет
көрсетілді
2 мин
оқу үшін

«Таза Қазақстан. Астана – тазалық пен тәртіптің үлгісі» ауқым­ды экологиялық акциясы аясында елорда мектептерінде «Экокүн» экологиялық фестивалі өтті.

Экология фестивалі

Мазмұнды іс-шара барысында оқу­шылар экология тақырыбына арналған тапсырмаларды орындады. Мәселен, қаладағы №72 мектеп-лицейде Алматы ауданындағы 6 мектептің 5-6-сынып оқушылары өзара бақ сынасты. «Экология және жасыл әлем» тақырыбында өткен экослет екі кезеңнен тұрды. Бірін­ші кезеңде оқушылар экология­лық бағыттағы білімдерін шыңдаса, екінші кезең туристік бағыттағы тапсырмаларға арналды.

«Бүгін «Таза Қазақстан» эко­ло­гиялық акциясы аясында қала­­лық Білім басқармасының ұйым­дастыруымен елордадағы бар­лық мектепте бір уақытта экофестиваль ұйымдастырылды. Мұндай жиын балалардың эколо­гия­лық дүниетанымына және шы­ғармашылығына жақсы әсер етеді. Сонымен қатар қоршаған ор­таны қорғау туралы көзқарасы қа­лыптасады. Жарыс түрінде өткі­зілген іс-шарада үздік нәтиже көр­сеткен мектеп оқушыларына дип­лом табысталып, тәтті сыйлықтар берілді», деді Астана әкімдігі Ба­ла­лар мен жасөспірімдердің ту­ризм және өлкетану орталығы ди­рек­­то­рының міндетін атқарушы Аслан Кенжеғалиев.

№72 мектеп-лицейі директоры­ның тәрбие ісі жөніндегі орынбасары Жанар Көпбаеваның айтуын­ша, аталған білім ордасында эко­логиялық бағытта түрлі іс-шаралар жиі өтеді екен.

«Біздің мектебіміздің оқушы­лары қалдықтарды сұрыптау, мек­теп аумағын көгалдандыру жұ­мыстарына белсене атсалысады. Жыл сайын сәуір-мамыр айларында экологиялық айлық өткіземіз. Әр аптаның тақырыптық атауын бекітеміз. Мысалы, «Тазару» апта­лығында оқушылармен бірге мектеп пен тұрғын үйлердің аулала­рын тазартамыз. Бұдан бөлек, «От­­басымен бірге ағаш ек» атты ап­талық бар. Онда оқушылар өз отбасымен бірге мектеп ауласына ағаш отырғызады. Ал бүгінгі фестиваль­ға мектеп жанындағы лагерьге ке­ліп жүрген балалар қатысты. Біз­де биыл спорттық лагерге 100-ге жуық, ал профильді лагерьге 315 бала қатысып жатыр. Сонымен қатар бастауыш сынып оқушыларына арналған «Балдырған» лагерінің бірінші кезеңінде 357 бала бар. Сондай-ақ балалар футбол және волейболдан тегін үйірмелерге қатысады», деді ол.