Фристайлшы Юлия Галышева – әлемде үшінші!

Кеше, 19 қаңтар күні қазақстандық Юлия Галы­­­шева Австрияның Крайшбер қаласында өтіп жатқан фристайлдан әлем чемпионатында жұпты могул сайысында қола жүлдеге қол жеткізді. Жарыстың бұл түрі бойынша бірінші орынды америкалық Ханна Кирни жеңіп алса, екінші нәтижені канадалық Жюстин Дюфур-Лапуант көрсетті. Ал кіші финалда Юлия келесі канадалық үш апалы-сіңлілердің бірі – Клоэ Дюфур-Лапуанттан басым түсіп, ақтық сынға жолдама алған болатын. Бұдан бір күн ғана бұрын Юлия могул сайысында бесінші нәтиже көрсеткен еді. Онда Жюстин Дюфур-Ла­­­пуант бірінші болса, Ханна Кирни – екінші, ал австра­лиялық Бриттени Кокс үшінші тұғырға көтерілген еді. Қалай дегенде де, Юлия­ның әлем чемпионатында үшінші орынға табан тіреуі – үлкен жетістік. Былтыр Сочи қысқы Олимпия ойындарында төреші­­­лердің дұрыс бағаламауынан жүлде­герлер қатарына ілікпей қалған оның әділетсіздікке қапаланып, спортпен қоштасқысы кел­генінен де хабардармыз. Дегенмен, жаңа маусым жет­кенде өзін өзі жеңе біліп, жаттығуын қайта жалғас­тырды. Бірақ өзіне спорт агент­тігінің қызметін көрсеткеннен басқаға шамасы жоқ жеке жаттықтырушысы Елена Круглыхинадан бас тартуына тура келді. Ол мына жарысқа да сырт жақтың демеушілік етуімен барған екен. Өскеменде 1992 жылғы 23 қазанда туған Юлия 2006 жылдан бері халықаралық жарыстарға қатысып келеді. Ол 2008 жылғы ақпанда немістің Шлирзе қаласында өткен Әлем кубогында жұпты могулда күміс жүлде алса, бірнеше күннен кейін шведтің Энгельберг кентінде могул мен жұпты могулдың екеуінде де алтын жүлдегер атанды. 2011 жылы Алматыда өткен Азия ойындарында да могулдан алтын медаль жеңіп алды. Өткен жылғы 13 желтоқсанда финнің Рука шаһарында ой­­налған Әлем кубогында спорт­шы қыз жұпты могулда алды­на жан салмады. Руслан ИГІЛІК.