Қызылорда облысында жаңа басқармалар құрылды

АСТАНА. 20 қаңтар. Қызылорда облысының жергілікті атқарушы органдарында бірқатар өзгерістер орын алды. Бұл туралы облыстық әкімдіктің баспасөз қызметі хабарлады. Облыс әкімдігінің қаулысына сәйкес мемлекеттік сәулет-құрылыс бақылау басқармасы, ветеринариялық бақылау басқармасы, жердiң пайдаланылуы мен қорғалуын бақылау басқармасы және Президенттің «Байқоңыр» кешеніндегі арнаулы өкілінің қызметін қамтамасыз ету басқармасы секілді жаңа мекемелер құрылды. Ал облыстық сыртқы байланыстар басқармасы облыс әкімі аппаратының құрамына қосылды.  Сондай-ақ, тілдерді дамыту басқармасы, дін істері басқармасы, жастар саясаты мәселелері басқармасы Қызылорда облыстық ішкі саясат басқармасының құрамына кірді. Ал облыстық мұрағаттар және құжаттама басқармасы мәдениет басқармасына қосылды.  Сондай-ақ, Қызылорда облысының құрылыс басқармасы» мемлекеттік мекемесі облыстың сәулет және қала құрылысы басқармасымен бірігіп, құрылыс, сәулет және қала құрылысы басқармасына айналды. Жолдыбай Базар. Дерек: Қызылорда облыстық әкімдіктің баспасөз қызметі Сурет: spk-baikonur.kz.