Қазақстан шекарасының кейінгі 80 жылдық тарихы осы басылым беттерінің тігіндісінде. Аға буын шекарашылардан бастап бүгінгі қызметкерлердің еңбегі мен қызметі. Отан тыныштығы үшін жанын пида етуге дайын ерлердің еңбегін әйгілеп жүрген «Отан сақшысы – Часовой Родины» газетінің тілшілері – ҰҚК Шекара қызметінің өңірдегі департаменттерінің әскери журналистері санатында. Сайдың тасындай тілшілер қосыны мұнда шекарашылардың ел шебіндегі өмірін қалт жібермей, тынымсыз тіршіліктері туралы қалам тербейді. Шекара тынысы мен шекарашының жүрек қағысына құлағын төсейді.
Шекарашылар басылымының алғашқы нөмірі Екінші дүниежүзілік соғыс қызып тұрған 1943 жылы 10 шілдеде оқырман қолына тиіпті. Қазақ редакциясының тұңғыш редакторы Сағидолла Сиқымбайұлы әскери шені полковник болғанымен, журналистер арасында «погонсыз генерал» атанған. «Сәкеңнің ізі шекарада сайрап жатыр» дейді білетіндер. Сондығынан шекарашылар өмірінен сыр шерткен публицистикалық жанрдағы кітаптардың қатары жыл өткен сайын молайып келеді. Өткен жылы «Сексен жылдық шежіре» деген атпен кітап болып шықты.
Осындай шежіреге бай газетті бүгінде подполковник Рахат Нұрғалиев басқарады. Ел шебіндегі тілшілер қатарын Мәскеудегі әскери журналистерді даярлайтын жоғары әскери оқу орнын бітірген екі түлек толықтырды. Сондай-ақ «OS-ЧР» газетінің жанынан видеостудия құрылғанын айта кеткен жөн. Аға лейтенант Аян Қайыр бастаған түсірілім тобы шекара қызметінің аясында өтіп жатқан ауқымды жиындардан табылып, тұщымды дүниелер жасаудың шеберлеріне айналған десек, артық айтқандық емес.
Газет тілшілері өңірдегі бұқаралық ақпарат құралдарымен тығыз қарым-қатынаста. Шекарашылар туралы бірнеше деректі фильм түсіріліп, «ҚаһарMЕN» әскери-патриоттық бағдарламасының шығармашылық түсірілім тобы Алматы облысы бойынша департаментінің учаскесіндегі шекара бөлімшелерінен тұщымды дүниелер жасады.
Капитан Асхат Жаналиповтің қарымды қаламының арқасында Каспий теңізінің байлығы – бекіреге көзін алартқан қаншама браконьер теңізші шекарашылардың құрығына ілінді. Мұнда қандай ауқымды шекаралық операциялар өтіп жататынынан дер кезінде хабардар болып отырады.
Майор Манарбек Қарекенов Жетісу облысы бойынша департаментінің шараларын республикалық, облыстық БАҚ-қа шығарып, халыққа жариялап келеді. Жақында өңірдегі журналистер Алакөл ауданы бойынша шекара басқармасы қызметінің, қарбаластан тұратын шекара бөлімшелерінің бірінде болып, шекарашылардың өмірімен танысып қайтты.
Биылғы қыркүйек айында ашылғанына ширек ғасыр толатын Сарыағаш ауданы бойынша шекара басқармасының алғашқы жылдардағы өмірі тәжік-ауған шекарасындағы «ыстық нүктеден» кем болмағанын жергілікті халық жақсы біледі. Газеттің осы өңірдегі меншікті тілшісі – Түркістан облысы бойынша департаментінің консультанты майор Рауан Нұрмет оңтүстіктегі шекарашылардың ерлігі жөнінде материалдар жариялап, жас сарбаздар мен офицерлерді отансүйгіштікке тәрбиелеуде және жауынгерлік рухты көтеруге үлесін қосып келеді. Қысқасы, еліміздің батысы мен шығысындағы, оңтүстігі мен солтүстігіндегі Отан қалқандарының өмірі әскери журналистер назарында. Ел мен жердің амандығын қырағылықпен қорғаушылар бар да әскери журналистиканың да жалауы желбірей береді. Шекарашылар қайда болса, әскери журналистер де сонда!
