АСТАНА. 20 қаңтар. Астаналық «Барыс» өз айдынында Уфаның «Салават Юлаев» командасын қабылдап, 3:2 есебімен жеңіске жетті. Бұл туралы vesti.kz хабарлады.
Бірінші кезеңде есеп ашылған жоқ. Десек те, қос тарапта да шайба соғатын тамаша мүмкіндіктер болды. Мәселен, ойынның небәрі үшінші минутында «Барыс» сапынан Константин Пушкарев тәртіп бұзып, екі минутқа айдыннан қуылды. Әйтсе де, бұл басымдықты уфалықтар пайдалана алмады. Өз кезегінде, айдын иелері де дәл осындай үш мүмкіндікке ие болғанымен, таблодағы есеп өзгеріссіз қалды. Кезең соңында «Салават Юлаев» тағы да ойыншылар саны жөнінен басымдыққа ие болды. Бұл жолы «Барыс» қақпашысы Павел Полуектов шеберлігімен көзге түсіп, өз иелігін голдан аман сақтап қалды.
Үзілістен кейін Андрей Назаровтың шәкірттері жинақылық танытып, ширақ қимылдауға көшті. Нәтижесінде, ойынның 34-минутында Роман Старченко есеп ашып, «Қазақстан» спорт кешеніне жиналған жанкүйерлерді қуанышқа бөледі. Екінші үзіліске дейін Уфадан келген команда қанша тырысқанымен, таразы басын теңестіре алмады.
Үшінші кезең тағы да «Барыстың» басымдығымен басталды. Төреші ысқырығы естіле салысымен шабуылға ұмтылған астаналықтар Кевин Даллмэннің дәл соққысымен есепті еселеді. Бұл ойынның 41-минуты еді және «Барыстың» ойыншы басымдығын пайдаланғанын айта кеткен жөн. Ал Даллмэнге нәтижелі пас шығарған Брэндон Боченский болды. Алайда, дер кезінде ес жиған қонақтар ойынның 51 және 57-минуттарында екі бірдей шайба соғып, есепті теңестіріп кетті. «Салават Юлаев» сапынан көзге түскендер, сәйкесінше, Евгений Скачков пен Антон Слепышев.
Ойынның бітуіне небәрі бір минут қалған кезде «Барыс» сапынан Николай Антропов тамаша соққысымен есепті 3:2-ге жеткізді. Көк жолақтың бойынан шайбаға иелік еткен ол үш бірдей қорғаушыны қапы қалдырып, қақпаны дәл көздегенін айта кетейік.
Бұл жеңісінен кейін «Барыс» Құрлықтық хоккей лигасының Шығыс конференциясында қайтадан 6-орынға көтерілді. Осыған дейін екі ойын қатарынан жеңілген олар 7-орынға түсіп қалған болатын. Елордалық команда келесі ойынын 22 қаңтар күні Новосибирскінің «Сибирь» командасына қарсы өткізеді. Аталмыш тартыс Астанада өтеді.
Еламан Қоңыр.
Дерек: vesti.kz.
Сурет: hcbarys.kz.
