Ерлер құрамасы әлем кубогі кезеңдерінде олжа салып әлемдік рейтингте алдыңғы лектен көрініп, Париж жазғы Олимпиадасының жолдамасын иеленді. Жігіттер соңғы жаттығу жиынын Испанияның Алмейра қаласында Еуропа мен Азияның тегеурінді командаларымен бірлесіп өткізбек.
Кейінгі жылдары семсерлесушілердің нәтижесі жақсарып келеді. Руслан Құрбанов былтыр әлем чемпионатының қола медалін олжалап, семсерлесу спортынан әлемдік аламанның жүлдесін алған алғашқы спортшы атанды. Отыз жылдың ішінде әлем чемпионатының жүлдесі бізге бұйырмай келген-ді. Былтыр еліміздің ерлер командасы әлем кубогінде топ жарып, жазғы Олимпиаданың жолдамасын иеленді.
Әйелдер сынында Әйгерім Сарыбай ел сенімін арқалайды. Біріккен Араб Әмірлігінде өткен лицензиялық турнирде Париж жазғы Олимпиадасының жолдамасын еншілеген еді.
