Аудан әкімі Дарын Шамұратовтың айтуынша, 1978 жылы Қазақстанның мемлекет және қоғам қайраткері, сол кездегі бірінші хатшы Дінмұхамед Қонаев дәл осы дөңнің үстінде жергілікті жұртшылықпен кездескен. Сол кезде Индер ауданының аумағындағы қазба байлықтың мол қоры қойылған мұражай да ұйымдастырылыпты. Содан бері индерлік тұрғындар бұл араға «Димаш төбе» атауын берген.
«Облыс әкімі Серік Шәпкеновтің ұсынысымен аталған тарихи орынды қайта жаңғыртып, ашық аспан астындағы мұражайға айналдыруды көздедік. Сол себептен бұл орынды өңірлік туристік картаға енгізу мақсатында жаңа жоба жасалды. Жобаға сәйкес ашық аспан астындағы мұражайға кірер тұстағы маңдайшаға «Димаш төбе» атауы жазылады», дейді Д.Шамұратов.
Әкімнің айтуына қарағанда, мұражай маңдайшасының сол жақ бағанына сол кезде түсірілген фотоның көшірмесі тұрады. Ал оң жақтағы бағанда мұражай жөнінде ақпарат беріледі. Ашық аспан астындағы жаңа мұражайдың аумағына Дендер күмбезіндегі қазба байлық түрлері, оның ішінде минерал тастар мен рудалары салынған бірнеше тас жәшік қойылады. Сондай-ақ екі үлкен күмбезді композиция орнатылады.
Атырау облысы
