- Сыйақыны молынан беретіндер тізімінде Қазақстан тоғызыншы орында тұр. Қазақ елінде чемпионға – 250 000, күміс пен қола жүлдегерлерге тиісінше 150 000 және 75 000 доллар төлеу қарастырылған. Сондай-ақ ең көп сыйақы беретіндердің ТОП-ондығында Түркия (А – 380 000, К – 230 000, Қ – 115 000), Грузия (А – 370 000, К – 185 500, 92 700), Таиланд (А – 365 150, К – 219 090, Қ – 146 060), Индонезия (А – 346 000, К – 138 500, Қ – 69 250), Израиль (А – 276 100, К – 207 100, 138 000), Малайзия (А – 236 000, К – 71 000, Қ – 24 000) сынды мемлекеттер бар.
- Еуропаның дамыған мемлекеттері төртжылдықтың басты додасында дараланған спортшыларының табысына аса бір емірене қоймайды. Мәселен, осы Олимпия ойындарын ұйымдастырып отырған Францияда бас жүлде 80 000 еуроға бағаланады. Германияда чемпионның есепшотына 20 000 ғана аударылады. Ал Ұлыбритания, Норвегия, Швеция секілді бірқатар елде сыйақы жағы мүлде қарастырылмаған.
- Жоғарыда аталған алпауыттарға қарағанда қарт құрлықтағы Италия (алтын үшін берілетін сыйақы 212 000 доллар), Украина (125 000), Испания (110 000), Мажарстан (166 000), Чехия (111 000) үкіметі басқарып отырған азаматтардың қолдары ашық екен.
- Өзге құрлықтарға келер болсақ, Үндістанның үкіметі алтын алған дүлдүлге 83 000 еуро төлесе, аталған елдің Ұлттық Олимпиада комитеті қосымша 110 000 береді. Оңтүстік Кореядан шыққан чемпиондарға 42 000 еуролық сыйақыдан бөлек, тағы бірқатар жеңілдік қарастырылған. Олар ай сайын 673 еуро көлемінде ғұмырлық сыйақы алып тұрады немесе бірден 47 000-ды өз есепшотына аударады. Таңдау спортшының өзінде.
- Әлемдік саясатта үстемдік жүргізіп отырған АҚШ Олимпиада чемпионына 37 500 доллар төлеумен шектеледі. Жүлдегерлер 22 500 және 15 000 алады. Алпауыт АҚШ-тың дәл іргесінде орналасқан Канаданың беретіні одан да аз. Олар бас жүлдені бар-жоғы 16 000-ға бағалап отыр. Экономикасы қарыштап дамып кеткен Жапония да спортшыларын қарық қылмайды. Күншығыс елінен шыққан Олимпия ойындарының жеңімпазына 45 000 доллар төленеді.
- Кезінде КСРО құрамында болған мемлекеттер арасында ең көп сыйақы беретін Грузия мен Қазақстан екенін жоғарыда айттық. Сол секілді әзербайжандар да мәрт екен. Олар чемпионның қолына 235 000 доллар ұстатады. Ал көршілеріміз жайында айтар болсақ, алтын тұғырға көтерілген саңлақтың есепшотына Өзбекстанда – 200 000, Қырғызстан Республикасында – 119 000,Тәжікстанда 14 000 доллар аударылады.
