Елжанадан ел үмітті
Көркем гимнастикадан сынға түскен Елжана Таниева іріктеу кезеңінде 7-орынға тұрақтап, финалдық сайысқа жолдама алды. Енді жоғары ұпай жинаған 10 гимнаспен медальға таласады. Ұршықпен өнер көрсетуде Елжананың шеберлігін төрешілер 32.300 ұпаймен бағалады. Үш снарядтан кейін 95,150 ұпай жинады.
Ұлттық олимпиадалық комитетке берген сұхбатында көркем гимнастикадан команданың бас бапкері Әлия Юсупова шәкіртінің аламанға алғаш рет қосылғанына қарамастан жаттығуды жоғары шеберлікпен орындағанын жеткізді.
«Елжана өте еңбекқор гимнаст, өзі алғаш қатысқан Олимпия ойындарынан керемет әсер алып отыр. Нәтижесі де жақсы деп санаймын, дегенмен де төрешілер ұршық жаттығуында төмен ұпай жазғаны түсініксіз. Ал доппен жаттығу жасауда қолынан түсіріп алып, қателікке бой алдырды. Ұршық жаттығуын мінсіз орындаса да ұпайы аз болды. Бас бапкер ретінде төрешілерге шағым түсіріп едім, өкінішке қарай, қанағаттандырмады», деді Ә.Юсупова.
Бас бапкер тек Елжана ғана емес, әлем чемпиондары, Олимпиада жүлдегерлерінің өзі де жаттығуды орындау мезетінде қателікке ұрынып жатқанын айтты. 18 жастағы шәкіртінің келешекте жоғары жетістікке қол жеткізіп, жанкүйерлерін қуантатынын атап өтті.
Су спортынан да көрсеткіш көңіл көншітпей тұр. Мария Бровкова каноэмен есуде жекелей сында сайысты ширек финалдан аяқтады. Әр топтан үздік нәтиже көрсеткен екі спортшы ғана жартылай финалға жолдама алатындықтан Бровкова өз тобында 4-орынды місе тұтып, жүлдеге таласу мүмкіндігінен қол үзді.
Байдарка мен каноэде есуден Тимур Хайдаров пен Сергей Емельянов В тобында сайысқа түскен. 500 метрге жүзуден өз тобында үшінші жеткенімен, жалпы есепте 11-сатыға тұрақтады.
Саңлақ сүрінді
Спорттық құзға өрмелеуден Әмір Маймұратов та жазғы Олимпия ойындарына тұңғыш рет қатысқан. Іріктеу сынында ол тіпті Олимпиада рекордын да жаңартқан. Бірақ ширек финалдық тартыста ирандық Реза Алипурмен сынға түсіп, 6,14 секунд қалып қойды. Оған себеп – аяғының тайып кетуі. Қателікке бой алдырған жерлесіміз қайта ұмтылғанымен уақытты ұзатып алды. Әмір Париж жазғы Олимпия ойындарының жолдамасын маусым айында Мажарстанның Будапешт қаласында өткен лицензиялық турнирде олжалаған еді. Сол доданың финалдық тартысында жерлесімізден басым түскен қытайлық У Пэнг Париж жазғы Олимпия ойындарының күміс медалін иеленді. Бұйырмай тұр екен, егер Әмір ирандық қарсыласымен сайыста қателікке ұрынбағанда медаль үшін де тартысқа түсер еді.
Спорттық құзға өрмелеуден Париж жазғы Олимпия ойындарының алтынын Индонезия спортшысы олжаласа, күміс медаль Қытай, қола АҚШ спортшысына бұйырды.
Қазіргі бессайыстан да көрсеткіш көңіл көншітпейді. Әйелдер арасында сынға түскен Елена Потапенко алғашқы сын – семсерлесуде 200 ұпаймен 27-сатыны місе тұтты. Жартылай финалдық тартысты А тобында өткізіп, 200 метрге суда жүзуде еркін әдіспен сынға түседі. Одан кейін конкурдан шеберлігін байқап, жүгіру барысында лазерлі тапаншамен нысана көздеуден бағын сынайды. Қазіргі бессайыстан Париж жазғы Олимпия ойындарына 72 спортшы қатысып, медальға таласады.
Өзбек оғланы – екі дүркін Олимпиада чемпионы
Таеквондодан Батырхан Төлеуғали Париж жазғы Олимпия ойындарын сәтті бастаған. 80 салмақ дәрежесінде сынға түскен жерлесіміз алғашқы айналымда Мали елінің үміті Исмаэль Кулибалиден басым түсті. Ширек финалда екі дүркін әлем чемпионы, осы салмақтың көшбасшысы италиялық Симоне Алессиоға қарсы айқасты. 18 жасында жазғы Олимпия ойындарына қосылған жерлесіміздің тәжірибесі кемшін соққаны байқалды. Батырхан – жастар арасында әлем чемпионатының күміс жүлдесін олжалаған спортшы. Таеквондодан ұлттық құраманың аға бапкері Нұрсұлтан Мамаев спортшылардың Олимпиада додасындағы айқасына пікір білдірді.
«58 кг салмақ дәрежесінде Самирхон Абабакиров үшін Париж жазғы Олимпия жарқырайтын шағы еді. Бірақ алғашқы айналымда Токио жазғы Олимпиадасының чемпионы, әлем чемпионатының жеңімпазы, Еуропа біріншілігінде топ жарған италиялық Вито Дел Акилаға есе жіберді. Самирхон да жазғы Олимпия ойындарына тұңғыш рет қатысып, даңқты қарсыласынан қаймықпай айқасты. Тіпті бірінші кезеңде алда тұрған, одан кейінгі кезеңде жеңісті уысынан сусытып алды. Батырхан Төлеуғали – елімізден барған спортшылардың ішіндегі ең жас саңлақ. Мұндай ірі доданың мысы болады, бұған дейін қатысып көрмегендіктен де қобалжыған шығар. Бірақ қарсыласынан тайсалған жоқ. Келешекте спортшыларымыз ел үмітін ақтайды», деді Н.Мамаев.
Біз таеквондошыларымыздың келешегінен үміт күтеміз, әрине. Бірақ біз ертеңге сеніммен қарауды місе тұтқанда Өзбекстанның спортшысы Ұлықбек Рашитов екі дүркін Олимпиада чемпионы атанып үлгерді. 2021 жылы Токиода өткен жазғы Олимпия ойындарының чемпионы атанғанда Ұлықбектің жасы 18-де еді. Арада өткен үш жыл ішінде ол өзінің екпініне екпін қосып, күш-қайратын толықтырды. Париж төрінде де жеңісті сапарын жалғап, 68 кг салмақтың үздігі атанды. Өзбекстан спортының тарихында жазғы Олимпия ойындарының екі дүркін чемпионы деген атақ та осы Ұлықбектің еншісіне жазылып отыр.
Әзірге спортшыларымыз 1 алтын, 3 күміс, 3 қола медаль көрсеткішімен 29-сатыда тұр.
