1999 жылдан бері ширек ғасыр уақытта бұл компания өзінің мақсатын орындап, тұтынушылар тарапынан дәмді, сапалы өнімдері үшін сый-құрметке бөленіп келеді. Компания құрамына енетін 24 бөлім еліміздің түкпір-түкпірінде орналасқан. Барлық зауыты ең жаңа еуропалық жабдықтармен жарақталған. Ал орталық кеңсесі Алматы қаласында орналасқан.
Сауда нүктелерін жаулаған «Масло-дел» 100-ге жуық азық-түлік өнімін шығарады. Соның ішінде сары май, өсімдік майы, өнеркәсіп майы, ірімшік, маргарин, майонез, кетчуп, томат пастасы, ұнтақталған сүт, қоюлатылған сүт өнімдері көпшілікке кеңінен танымал.
«Масло-дел» компаниясының бірнеше кәсіпорны біздің өңірде де бар. Петропавлдағы «Масло-дел» сүт зауыты 2004 жылы ашылған. Бұл зауыт сарымай, ультра пастерленген сүт, айран, қаймақ, ірімшік және ашытылған сүт өнімдерінің басқа да түрін өндіреді. Өндірістің қуаты жылына 66 мың тоннаға дейінгі шикі сүтті өңдеуге жетеді. Ондағы шетелдік өңдеу құралдарының қуаты тәулігіне 200 тоннадай сүтті өңдеуге шақталған.
Кәсіпорын шикізаттың 70 пайызын шаруашылықтардан, 30 пайызын жеке адамдардан қабылдайды.
Қазір өңірде 100 агроқұрылым сүт өндірумен айналысады. Соның 36-сы – заманауи тауарлы-сүт кешені. Биыл тағы 9 тауарлы-сүт фермасы салынып жатыр. Ол үшін Еуропа елдерінен, Ресейден 1 500-ден астам тұяқ қара мал жеткізілді. Былтыр ғана «Солтүстік» ӘКК-нің жеңілдетілген несиесі арқылы «Атамекен-Агро Корнеевка», «Азия Торанғұл», «Гердт», «Нежинка Ерке», «Зеленые луга» ЖШС тауарлы-сүт фермаларын тұрғызуға ниет білдіріп, биыл олардың көбі қаржыландырылып, іске кіріскен. Әрқайсысы 400-ден 1 300 тұяққа шақталған кешендер салған. Облыста барлығы осындай 18 кешен тұрғызылмақшы. Оған 17 млрд теңге қарастырылған.
Ауыл шаруашылығы министрлігі биылғы жартыжылдықта былтырға қарағанда сүт өндіру 4,8 пайызға ұлғайғанын жариялаған еді. Осы жетістіктің негізін қалағандардың бірі – солтүстіктің сүт өндірушілері. Қазір мұнда барлығы 700 мың тоннадай сүт өндіріліп, одан 215 мың тоннаның дайын өнімі алынады. Республика бойынша барлық сүт өндіру мен өңдеудің 25 пайызы терістікке тиесілі.
Міне, осындай тауарлы сүт кешендерінің шикі сүті «Масло-делге» жеткізіліп, өңделіп, дайын өнімге айналған соң, еліміздегі 50 мыңнан астам сауда нүктесінде тұтынушыға ұсынылады. Сонымен бірге, кәсіпорын сүт, айран және қаймақ өнімдері бойынша тәуліктік қуаттылықты 60 тоннадан 450 тоннаға дейін жеткізе алатын жабдықтармен жаңғыртуды көздеп отыр. Қазір зауыт жылына 104,8 мың тонна дайын өнім шығарады.
Компанияның Петропавлдағы филиалының басшысы Инна Пискунованың айтуынша, былтыр фирма облыста ірі салық төлеушілердің қатарына қосылған. Өнім сапасына да ешкімнен шағым түспеген.
«Өнімдеріміздің сапасы жоғары. Кез келген әділетті бәсекеге төтеп бере аламыз. Елімізге сырттан әкелінген, нақты айтсақ Ресейден енгізілген сүт өнімдеріне қарағанда біздің өнімдеріміздің сапасы әлдеқайда жоғары екенін зертханада арнайы тексеруден өткізіп, көзімізді жеткіздік», дейді.
Отандық сүт өнімдері сапасын анықтайтын «Dosmart.kz» кэшбэк-сервис» ұйымы 2021 жылы 313 азық-түлік дүкенінен сатып алынған 74 мың сүт чектерін саралаған қорытындыны жариялады. Сөйтіп, сүт өнімдері рейтингін анықтаған еді. Сонда «Петропавлдың сүті» атауымен сатылған Қызылжар сүті Алматы, Семей, Өскемен, Шымкент, Талдықорған, Қызылорда қалаларында бірінші орын алған. Жалпы, «Масло-дел» компаниясының иелігінде сүт зауыттары ғана емес, элеватор, май пресс зауыты және май комбинатын қоса алғанда бес өндірістің желісі бар. Бұл интеграцияланған құрылым өнімдердің жоғары сапа стандартын қамтамасыз етуге мүмкіндік береді.
Солтүстік Қазақстан облысы
