Биыл 7 айда ауыл шаруашылығы жалпы өнімінің көлемі 3,7%-ға ұлғайып, 2,1 трлн теңгені құрады. Бұл ретте, мал шаруашылығы жалпы өнімінің нақты көлем индексі 103,7%-ға жетті және мал шаруашылығы өнімін өндіру көлемі 1,7 трлн теңгені, өсімдік шаруашылығының нақты көлем индексі 104%-ды құрап, өнім өндіру көлемі 402,9 млрд теңге болды.
Жоспарланған көрсеткішке қол жеткізу егін жинау жұмыстары аяқталғаннан кейін екінші жартыжылдықта қамтамасыз етіледі деп күтілуде, өйткені өсімдік шаруашылығы өнімдерін өндіру жалпы өнімнің жартысынан көбін алады.
Министрлік алға қойылған мақсаттарға жету үшін барлық қажетті шараларды қабылдап келеді. Мәселен, көктемгі егіс жұмыстарын жеңілдетілген несиелеу үшін қарастырылған 580 млрд теңгенің 342,6 млрд теңгесі игерілді. Қазіргі уақытта қосымша 20,4 млрд теңгенің өтінімдері қарастырылуда, егін жинау жұмыстарына өтінімдер жинау жалғасу үстінде.
Солтүстік Қазақстан, Қостанай, Павлодар, Шығыс Қазақстан, Қызылорда және Ақмола облыстары ӘКК арқылы жеңілдікті кредиттеу бойынша белсенді жұмыс атқарып отыр. Бұл өңірлерге осы мақсаттар үшін 75 млрд теңге қарастыру көзделген. «ҚазАгроҚаржы» арқылы ауыл шаруашылығы техникасының жеңілдетілген лизингі бойынша 62,7 млрд теңге сомасына 2 298 бірлік ауыл шаруашылығы техникасына шарттар жасалды.
Биылғы 7 айда азық-түлік өндірісі 0,4%-ға артып, 1,8 трлн теңгені құрады. Ірімшік пен сүзбе өндірісінің 13,5%-ға, өңделген күріштің 14,2%-ға, өсімдік майының 9,8%-ға, ашытылған сүт өнімдерінің 5%-ға өскенін ерекше атап өткен жөн.
Жоспарланған индикаторларға қол жеткізу үшін биыл 50,9 млрд теңге сомасына 79 инвестициялық жоба іске асырылды. Оның ішінде ауыл шаруашылығы өнімдерін қайта өңдеу бойынша – 8,8 млрд теңге сомасына 14 жоба, мал шаруашылығына – 4,9 млрд теңгеге 11 жоба, өсімдік шаруашылығына – 14,9 млрд теңгеге 36 жоба, құс фабрикасына – 6,7 млрд теңгеге 4 жоба, тауарлы-сүт фермалары – 11,5 млрд теңгеге 5 жоба және бұдан басқа да біршама жоспарлар қарастырылған.
Отандық өндірушілерді қолдау мақсатында ауыл шаруашылығы өнімдерін қайта өңдеуді дамытудың 2028 жылға дейінгі Кешенді жоспары әзірленді. Оны іске асыру үшін республикалық бюджеттен 372 млрд теңге мөлшерінде қосымша қаражат бөлуді талап етеді.
Жалпы алғанда, қабылданып жатқан ауқымды іс-шаралар ауыл шаруашылығының жалпы өнімін 11,6% деңгейінде ұлғайтуға мүмкіндік беріп отыр деп сенімді түрде айта аламыз.
