Жас географтар жүлдесі

Қазір әлемде халық­ара­лық деңгейдегі беделді жеті олимпиада бар. Олар математика, физика, химия, информатика, география, лингвис­тика, биология пәндерінен дәстүрлі түрде өтеді. Соның бірі – халықаралық география олимпиадасы жыл сайын жоғары сынып оқушылары ара­сында ұйымдастырылады.

«IGeO алғаш рет 1996 жылы Халықаралық география­лық одақ­тың (IGU) қолдауы­мен Ни­дер­ланд мемлекетінің Гаага қаласында өткен еді. Ал Қа­зақ­стан құрама командасы атал­ған сайысқа 2012 жылдан бері қатысып келеді. Биыл төрт оқу­шымыз тамыз айында Ресейдің Тверь облысындағы оқу-жаттығу жиындарынан өтті. Нәтижесінде, төртеуі де елге олжалы оралды. Жарыс үш кезеңнен тұрды. Жаз­баша кезеңде алты тапсырма бе­ріледі, ал оның нәтижесі жалпы сайыстың қырық пайызын құрайды. Ал екінші, далалық кезеңде оқушылар ақпаратты өңдеп, талдап, жоспар құ­рады. Соңғы кезең мультиме­дия деп аталады. Мұнда қа­ты­сушылар 40 сұраққа 60 минут көлемінде жауап беру­лері тиіс», дейді «Дарын» рес­пуб­ликалық ғылыми-прак­тика­лық орталығы дирек­торының ­орынбасары Нұрлан Жұмагелді.

Биыл үздік нәтиже көрсет­кен Қазақстан командасының құрамында Талдықорған қала­сындағы физика-математика бағытындағы Назарбаев зият­керлік мектебінің 11-сынып оқу­шысы Ақжол Болат, Жамбыл об­лысындағы дарынды балаларға арналған мамандандырылған «Дарын» лицей-интернатының 11-сынып оқушысы Жомарт Сабыр, Шымкент қаласындағы химия-биология бағытындағы Назарбаев зияткерлік мек­те­бі­нің 11-сынып оқушысы Арсен Сыдықов, Шымкент қаласындағы химия-биология бағытындағы Назар­баев зияткерлік мектебі­нің 11-сынып оқушысы Қанат Серікбай бар.

«Биылғы білім бәсекесіне 50 мемлекеттің 200-ге жуық оқу­­шысы қатысты. Солар­дың ара­­сы­нан топ жару, әрине ­оңай емес. Дайындығыңа сай нә­ти­же көр­сетесің. Өз басым ­бес жыл тынбай тер төктім. Міне, бүгін сол ең­бектің жемісін көріп отырмыз. Әлбетте бұл – ғылымдағы жо­лым­ның бас­тауы ғана. Осы жылы күмісті қанағат тұттық, бұ­йырса келер жылы алтыннан алқа тақ­сам деген мақсатым бар. Осы орайда географияға қызы­ғу­шылығымды арттырып, дұрыс бағыт-бағдар берген же­текшім Нағима Бекетқызына алғыс айтқым келеді», дейді Назарбаев зияткерлік мекте­бінің 11-сынып оқушысы Ақжол Болат.