АСТАНА. 13 маусым. Футболдан 2016 жылғы Еуропа чемпионатына іріктеу турнирі аясында Қазақстан өз алаңында Түркияны қабылдап, 0:1 есебімен жеңіліп қалды. Осылайша ұлттық құрамамыз аталған турнир барысында қатарынан бесінші рет қарсыластарына есе жіберіп отыр. Бұл туралы egemen.kz хабарлады.
Алғашқы тайм тең жағдайда өрбіді. Бастапқы минуттарда қонақтар басымдыққа ие болғанымен, уақыт өте алаң иелері де сенімді ойын өрнегін көрсетті. Тіпті Сергей Хижниченко гол да салған болатын. Дегенмен, ол ойыннан тыс қалып, есеп ашылған жоқ. Одан бөлек Ұлан Қонысбаевтың да қақпашымен бетпе-бет шығатын мүмкіндігі болған.
Жалпы, матчтың бірінші бөлігінде біздің ойыншылар сапынан Дмитрий Шомкода ғана гол соғатын керемет сәт болды. Алайда, оның соққысын қақпашы Бабаджан қайтарды. Ал Түркия сапынан Мехмет Топал мен Бурак Йылмаздар гол соғатын мүмкіндіктерін пайдалана алмады.
Екінші тайм Қазақстаның шабуылымен басталды. Бауыржан Исламханның айып алаңына еніп барып, алыс бұрышты көздеп жасаған соққысы қақпадан сәл ғана қиыс кетті. Артынша Қонысбаевтың да соққысы қақпа бағанын жанап өтті. Кездесудің 65-минутында команда капитаны Самат Смақов жарақат алып, ойынды өзгелерден ерте аяқтауға мәжбүр болды. Бас жаттықтырушы оның орнына жас қорғаушы Абзал Бейсебековті шығарғанымен, Саматтың орны ойсырап тұрды. Нәтижесінде түріктердің дәл осы орталық алаңнан бастаған шабуылдары қақпаға жасалған соққылармен аяқталып жатты. Сондай сәттердің бірінде Бурак Йылмаз Покатиловпен бетпе-бет шығып, соққы жасады. Абырой болғанда, доп қақпа бағанынан кейін серпілді.
Ойынның 83-минутында қонақтар есеп ашып, дегендеріне жетті. Айып алаңының ішінде әріптестерінен пас алған капитан Арда Тұран айналып барып соққы жасады. Бұған дейін бірнеше қауіпті соққының бетін қайтарып үлгерген қақпашымыз бұл жолы еш шара қолдана алмады. Нәтижесінде жалғыз гол ойын тағдырын шешуге жеткілікті болды.
Кездесудегі статистикалық көрсеткіштерге назар аударайық. Фатих Теримнің шәкірттері кешегі ойында 19 мәрте қақпаға соққы жасаса, соның 6-уын тура бағыттаған. Ал Қазақстан 4 соққымен жауап берді. Оның біреуі ғана қақпа аңғарына дәл жасалды. Бұрыштама добы бойынша да қонақтар екі есе басымдыққа ие (3 – 7). Десек те, допқа иелік ету көрсеткіші жағынан айтарлықтай есе жібердік дей алмаймыз (44% – 56%). Тіпті 1-тайм қорытындысы бойынша бұл көрсеткіш 50% – 50% болғанын айта кетейік.
Осылайша, Юрий Красножаннан тәлім алатын футболшыларымыз 1 ұпаймен «А» тобындағы соңғы орнында қалды. Ал ұпай санын 8-ге жеткізген түріктер әзірге 4-орында. Топ басында 15 ұпаймен Исландия келеді. Кеше түнде олар Чехия құрамасын 2:1 есебімен жеңген болатын. Ал үшінші сатыға орналасқан Нидерланды (10 ұпай) кеше сырт алаңда Латвиядан 2:0 есебімен басым түсті.
Қазақстан – Түркия 0:1 (0:0)
12 маусым. Алматы. «Орталық» стадионы. 26 000 көрермен.
Төреші: Майкл Оливер (Англия).
Қазақстан: Стас Покатилов, Самат Смақов (Абзал Бейсебеков 67), Марк Гурман (Асхат Тағыберген 78), Ренат Абдулин, Сергей Малый, Дмитрий Шомко, Генрих Шмидтгаль, Юрий Логвиненко, Ұлан Қонысбаев, Бауыржан Исламхан (Жамбыл Көкеев 85), Сергей Хижниченко.
Түркия: Волкан Бабаджан, Сердар Азиз, Хакан Балта, Гекхан Генюл, Семих Кайя (Емре Ташдемир 75), Озан Турфан (Үміт Булут 64), Арда Тұран, Мехмет Топал (Волкан Шен 46), Селчук Инан, Хакан Чалханоглу, Бурак Йылмаз.
Гол: Арда Тұран 83.
Ескертулер: Генрих Шмидтгаль 77, Ренат Абдулин 88, Дмитрий Шомко 90+2.
Еламан Қоңыр.
Дерек: egemen.kz.
Сурет: sports.kz.
Кеше Алматыдағы ойыннан бөлек, аталған іріктеу турнирі аясында тағы 8 кездесу өтті. Ол матчтардың нәтижелері төмендегідей:
«А» тобы
Исландия – Чехия 2:1 (0:0)
Голдар: Гуннарссон 60, Сигторссон 76 – Дочкал 55.
Латвия – Нидерланды 0:2 (0:0)
Голдар: Вейналдум 67, Нарсинх 71.
«В» тобы
Босния және Герцеговина – Израиль 3:1 (2:1)
Голдар: Вишча 42, 75, Джеко 45+2 (пенальти) – Бен Хаим 41.
Уэльс – Бельгия 1:0 (1:0)
Гол: Бэйл 25.
Андорра – Кипр 1:3 (1:2)
Голдар: Досса (автогол) 2 – Мытидис 13, 45, 53.
«Н» тобы
Норвегия – Әзербайжан 0:0
Хорватия – Италия 1:1 (1:1)
Голдар: Манджукич 11 – Кандрева 36.
Мальта – Болгария 0:1 (0:0)
Гол: Попов 56.
