Батыс Қазақстан облысы әкімінің орынбасары тағайындалды

ОРАЛ. 14 маусым. Батыс Қазақстан облысының әкімі Нұрлан Ноғаевтың өкімімен Нариман Төреғалиев Батыс Қазақстан облысы әкімінің орынбасары болып тағайындалды. Бұл туралы egemen.kz тілшісі хабарлады. Кеше облыс активінің жиынында өңір басшысы осы кезге дейін облыс әкімінің орынбасары болған Марат Кәрімовке атқарған қызметі үшін ризашылығын білдіріп, жаңа орынбасары Нариман Төреғалиевке сәттілік тіледі. Облыс әкімінің баспасөз қызметінен алынған мәліметке қарағанда, Нариман Төреғалиев 1964 жылы сол кездегі Орал облысы, Тайпақ ауданы, Есенсай ауылында туған. Білімі жоғары, 1990 жылы Жамбыл гидромелиоративтік құрылыс ииститутын, 2004 жылы Қазақ қоғамдық университетін бітірген. Мамандығы – инженер-экономист, заңгер. Еңбек жолын бұрынғы Ақжайық ауданының «Есенсай» кеңшарында 1981 жылы жұмысшы болып бастаған. Ал осыған дейін, яғни, 2012 жылдан бері Ақжайық ауданының әкімі қызметін атқарды. Темір Құсайын. Дерек, сурет: egemen.kz.