Фото: Ведомство. Телеграм
Үйлестіру кеңесіне Су ресурстары және ирригация министрлігінің, БҰҰ Даму Бағдарламасының (БҰҰДБ) және басқа да халықаралық ұйымдардың, қаржы институттарының, донорлық қауымдастықтардың және басқа да құрылымдардың өкілдері кіреді.
Аталған министрліктің мәліметінше, Үйлестіру кеңесінің негізгі міндеттері:
- Ұлттық басымдықтарға сәйкес мемлекеттік органдардың, БҰҰДБ, халықаралық қаржы ұйымдары мен донорлық қоғамдастықтың келісілген іс-қимылын қамтамасыз ету. Кеңес алға қойылған мақсаттарға жету үшін қаржы және техникалық ресурстарды жұмылдырумен және тиімді бөлумен айналысады.
- Негізгі стратегиялық құжаттарды: Су кодексін, Су ресурстарын басқару жүйесін дамыту тұжырымдамасын және Су саласын дамытудың кешенді жоспарын әзірлеуді және іске асыруды қолдау, сондай-ақ су ресурстарын тұрақты басқарудың заңнамалық базасы мен институционалдық тетіктерін нығайту.
- Су ресурстарын басқару саласында озық халықаралық тәжірибе мен инновациялық шешімдерді енгізу. Кеңес білім мен тәжірибе алмасуды қамтамасыз етеді, мамандардың әлеуетін арттырады және су ресурстарын тұрақты басқару қағидаттары туралы азаматтарды хабардар етеді.
- Бірлескен күш-жігердің тиімділігін бақылау және бағалау тетіктерін әзірлеу мен енгізу.
- Суды басқару саласындағы аймақтық ынтымақтастықты нығайту және климаттың өзгеруіне және құрғақшылық пен су тасқыны сияқты табиғи апаттарға төзімділікті арттыру.
«Үйлестіру кеңесін құру елдегі ұзақ мерзімді экологиялық тұрақтылық пен экономикалық дамуды ілгерілету тұрғысында маңызды рөл атқарады. Үйлестіру кеңесі ресурстарды жұмылдыруға, басқаруды нығайтуға, өңірлік ынтымақтастықты кеңейтуге, су ресурстарын басқаруда тұрақты тәжірибелерді ілгерілетуге ықпал ететін болады. Ұжымдық күш-жігер күн сайын өзектілігі артып жатқан климаттық сын-қатерлерді шешу және Қазақстан мен жалпы Орталық Азия үшін тұрақты болашақты қамтамасыз ету бойынша маңызды рөл атқарады», деді сала министрі Нұржан Нұржігітов.
