фото Сенаттың баспасөз қызметі
Әскери қызметшілердің өмірі мен денсаулығына және әлеуметтік бейімделуіне лайықты жағдайдың болуы олардың бейбіт уақытта да, соғыс уақытында да психологиялық ахуалы мен қауіпсіздігіне тікелей әсер етеді. Атап айтқанда, қазіргі заманғы қару-жарақпен тиімді және қауіпсіз қызмет атқаруда әскердің моральдық тұрғыда даярлығы шешуші рөл атқарады.
Отырысқа қатысушылар кейінгі уақытта Қарулы Күштер қатарында болған қоғамдық наразылық туғызған бірқатар оқиғаларды атап өтті. Сенаторлар сондай-ақ Мемлекет басшысының әскери қызметшілердің денсаулығы мен қауіпсіздігі ерекше бақылауда болуы тиіс деген тапсырмасын еске салды.
Қорғаныс министрлігінің өкілі өз кезегінде әскер өмірін жақсарту жөнінде жұмыс жүргізіліп жатқаны және қызмет жағдайымен қоса лауазымдық жалақы мен ақшалай үлес кезең-кезеңмен ұлғайғаны туралы хабарлады. Алайда, әлеуметтік жеңілдіктер топтамасы әлі жетілдіруді талап етеді.
Сонымен қатар әскери қызметшілерді сапалы тамақтандыруды ұйымдастыруды қайта қарау мәселесі де көтерілді.
