Референдумды аты аңызға айналған опера әншісі, Мемлекеттік сыйлықтың лауреаты Бибігүл Төлегенова да қолдады. № 559 дауыс беру учаскесінің өкілдері оның тұрғылықты жеріне бюллетеньдер қорабын әкелді. Халық әртісі бұл оқиғаның маңызын атап өтті. Оның айтуынша, референдумға қатысу – әрбір азаматтың жауапкершілігі.
«Мұндай шешімдер мұқият ойлауды талап етеді, өйткені бұл қазіргі жағдайға ғана емес, ұрпағымыздың болашағына да әсер етеді. Мен мемлекет үшін маңызды мәселеде өз даусымды бергенімді мақтан тұтамын», деді Бибігүл Ахметқызы.
Мегаполисте алғашқылардың бірі болып өзінің таңдау құқығын қоғам қайраткері Асылы Осман да пайдаланып, Алматы музыкалық колледжінің №64 учаскесінде дауыс берді.
Париждегі ХХХІІІ жазғы Олимпия ойындарының бокстан қола жүлдегері Назым Қызайбай да референдумға қатысты. Атақты спортшы өзінің азаматтық міндетін алғашқылардың бірі болып орындады.
Кино және театр актрисасы, тележүргізуші Қарагөз Сүлейменова да референдумға қатысты. Әртіс №77 орта мектептегі №414 дауыс беру учаскесінде дауыс берді.
«Әрқайсымыз осындай іс-шараларға қатысуымыз керек. Өйткені олар балаларымыздың болашағына әсер етеді. Референдум өз пікірін білдіріп, өз таңдауын жасауға мүмкіндік береді», деді Қ.Сүлейменова.
Алматыда референдумға 50 жылдығын тойлайтын жұп қатысты. Алтын тойын атап өтіп жатқан Нұрғали Қанаев пен Орынша Берденова Жетісу ауданындағы №349 учаскеде өз құқығын пайдаланды. Мерейтой иелері немерелерінің болашағын елдің жан-жақты тұрақтылығымен байланыстырады.
Дауыс беруге Екінші дүниежүзілік соғысының ардагерлері де қатысты. Олардың арасында ғасыр жасаған майдангер, II дәрежелі Ұлы Отан соғысы орденінің иегері және «Жауынгерлік ерлігі үшін» медалінің иегері Виктор Изюмников те бар. Виктор Карповичтің айтуынша, азаматтық ұстанымның жөні бөлек.
«Мен жүз жасқа толдым, өз өмірімде көп нәрсе бастан кешірдім. Әрине, жастардың тағдырына немқұрайды қарамаймын, сондықтан да мен барлығынан референдумға қатысып, өзінің азаматтық жауапкершілігін көрсетуге шақырамын», дейді ардагер.
АЛМАТЫ
