Бородулиха ауданы Новопокровка ауылында ұйымдастырылған сенбілікте жергілікті тұрғындар мен мекеме, кәсіпорын өкілдері Жура өзенінің арнасын қалың қамыстан тазартып, су ағынын жақсартуға, көктемгі су тасқыны қаупін азайтуға атсалысты. Акцияға тек жергілікті тұрғындар ғана емес, бюджеттік мекемелердің қызметкерлері, студенттер мен оқушылар қатысты. Новопокровка ауылдық округі ақсақалдар кеңесінің төрағасы Анатолий Романов мұндай іс-шаралардың қоғамдық мән-маңызына тоқталып, туған жерге қамқорлық жасау әр адамның міндеті екенін баса айтты.
Дәл осындай іс-шара Мақаншы, Үржар, Жарма, Ақсуат, Абай, Көкпекті, Аягөз аудандарында да өтіп, саябақтардың сәні кіріп, қоғамдық орындар қоқыстан тазартылды. Іс-шара барысында Бесқарағай ауданының орталығында жаңа саябақтың құрылысы да аяқталды. Саябақта балалар ойын алаңы, LED-экран, сахна, теннис, шахмат үстелдері орын алған. 150 қарағай мен шетен ағаштары отырғызылып, 42 шам орнатылды.
Абай облысы әкімінің баспасөз қызметі ұсынған дерекке сүйенсек, «Таза Қазақстан» бағдарламасы жүзеге асырыла бастағаннан бері акцияға облыста 100 430 адам, оның ішінде 3 626 ұйым мен мекеме өкілдері араласқан. Жұмысқа 2 087 бірлік техника жұмылдырылды. Нәтижесінде, 99 023 аула тазаланып, 55 131 тонна қатты тұрмыстық қалдық қоқыс полигондарына жеткізілді. Облыс көлемінде 239 саябақ пен сквер тазартылып, 313 ескерткіштің айналасы абаттандырылды, 741 шаршы метр тасжол жөнделді. Сенбіліктерге 1 077 әлеуметтік, 2 261 өндірістік нысан, сондай-ақ 934 жасанды су қоймасы қамтылды.
Семей қаласында «Таза Қазақстан» акциясы аясында кейінгі өткізілген сенбілікке 8000-нан астам қала тұрғыны қатысты. Сенбілік барысында қала аумағы 14 учаскеге бөлініп, әр учаскеге Семей қаласы әкімдігінің дербес бөлімдері бақылау жасады. Қаланың түрлі шағын аудандарында, көше, аулаларында қоқыс жинау, жасыл аумақтарды абаттандыру, тазалау жұмысы жүргізілді.
Абай облысы
