Жалпы, Жетісу топырағында мұғалімдік жолды таңдаған отбасы өте көп. Көбіне елді мекендерге бара қалсаңыз, ата-анасы мен балалары мектепте қызмет ететін әулеттерді жиі кездестіресіз. Оған үлгі – оқушыларға білгенін үйретіп, осы мамандық ғибрат алуды мақсат тұтқан – Үмбетовтер отбасы. Бүкіл өмірін өскелең ұрпақты тәрбиелеуге арнаған отбасында отағасы Сейітбек Мырзахметұлы мен оның жұбайы Нұриша Баймырзақызы өткен ғасырдың 50-жылдарында педагогтер әулетінің негізін қалаған.
«Ұстаз болу – менің бала арманым десе болады. Осы мамандықты таңдауыма менің алғашқы ұстазым себепкер болды. Ол сыныптағы әр оқушының бабын тауып, сабақтарды да ерекшелеп, бір-бірінен өзгеше өткізетін. Оның оқушыны сабаққа баурап алатыны мені тамсандыратын. Сол кезде-ақ мен өзімді мұғалім ретінде көретінмін. Сабақ соңынан қалып, ұстазыма дәптер тексеруге көмектесетінмін. Менде оқушылардың білімін бағалайтын өз журналым болатын, онда мұғалім екеуіміз бірге баға қоятынбыз. Ұстазымның осындай сабақ беру тәсілдері менің мұғалім болуыма әсер етті», дейді әулет үлкені Сейітбек Мырзахметұлы.
Аталған әулеттің кішкентай балалары да болашақта мұғалім болуды армандайды. Бүгінде отбасында 11 педагог – сегіз математик, үш бастауыш сынып мұғалімі, бір физика мұғалімі бар. Мәселен, отағасы Сейітбек Мырзахметұлы 41 жылдық ұстаздық қызметінде математика пәні мұғалімінен Лесновка, Соцжол ауылдарында мектеп директорлығына дейінгі жолды жүріп өткен. Одан кейін тағы 20 жыл Қоңырөлең ауылындағы орта мектепте директордың оқу ісі жөніндегі орынбасары болыпты. Талай жылғы еңбегімен еленіп, елдің қошеметімен сол жерден құрметті еңбек демалысына шықты. Оның жұбайы, отбасының ұйтқысы, «Алтын алқа» иегері Нұриша Баймырзақызы Басши, Лесновка, Соцжол, Қоңырөлең ауылдарындағы бастауыш мектептерде еңбек еткен. Жұбайына демеу бола отырып, ол мектептегі міндеттерін, сегіз баланы оқыту мен тәрбиелеуді қатар алып жүрді.
«Мұғалім мамандығының ең қиыны – дамып отыруға деген қажеттілік. Мұғалім қашанда өзінің білімі мен біліктілігін шыңдап отыруы керек. Бұл оңай емес, бұған шыдамдылық, алға қойған мақсатыңа ұмтылу қажет. Өзін жеке тұлға ретінде дамыту керек. Заманауи мұғалім дамымаса, тоқырауға ұшырайды», дейді Н.Баймырзақызы.
Ата-анасына қарап бой түзеген қыздары Ардақ, Нұргүл, Бақытгүл, ұлы Марат педагогикалық университеттерге оқуға түсіп, математика пәнінің мұғалімдері атанды. Қазіргі таңда Ардақ пен оның жұбайы Баймұхан Нұрмұхамедов – білім саласының еңбек сіңірген ардагерлері. Нұргүл 25 жыл бойы Қоңырөлең орта мектебінде математикадан сабақ берді, ал қазіргі уақытта М.Ганди атындағы №92 Алматы лицейінде жұмыс істейді. Бақытгүл Б.Момышұлы атындағы гимназияда сабақ береді. 41 жыл бастауыш сынып мұғалімі болған және үлкен отбасының келіні, Сейітбек Мырзахметұлының үлкен ұлы Болаттың жұбайы Жаңыл Өтегенова, оның қызы Мақпал Абай атындағы Қазақ педагогикалық университетін бітірген.
Ұлы Марат пен оның жұбайы Гүлназира Оспанбекова Қоңырөлең ауылында Қожбанбет би атындағы орта мектепте отыз жыл бойы математикадан сабақ берді. Бір ұжымда иық тіресе жұмыс істей отырып, ерлі-зайыптылар үлкендердің даналығы мен өсиеттерін жас ұрпаққа сіңіруге тырысады.
«Отбасын құрғаннан кейін ата-аналарымыз мектепте тынбай жұмыс істеді. Әкеміз бен анамыз еліміздің лайықты азаматтарының бірнеше ұрпағын тәрбиелегенін мақтан тұтамыз. Қаншама тер төгіп еңбек етсе де, олар бізді де назардан тыс қалдырмай, ұлтымыздың үздік дәстүрлерін бойымызға сіңірді. Мен әкемнің ісін жалғастырғаныма шын жүректен қуаныштымын. Бүгін мен мамандық таңдауда қателеспедім деп сенімді түрде айта аламын, ұстаздық жол – менің арманым екеніне көзім жетті. Сондай-ақ тек оқытып қана қоймай, үнемі ізденісте болу, жаңа білімді меңгеру өте маңызды, заман ағымынан қалмай, креативті ойлау қажет. Жастар – еліміздің болашағы, сондықтан біз аға буын ретінде ата-бабаларымыздың бай мәдени мұрасын сақтап, балаларға беруіміз керек, нағыз патриоттық рухта тәрбиелеуіміз қажет. Ұстаздың басты мақсаты мен міндеті де осы», дейді М.Сейітбекұлы.
Панфилов ауданындағы мұғалімдер әулеті еңбегі мен кәсібилігінің нәтижесінде көптеген құрметті марапатқа ие болды, бірақ олар үшін ең бастысы – оқушыларының биіктен көрінуі. Бұл әулет жеткен жетістігімен шектеліп қалмайды, ізгі істерін одан әрі жалғастыруға ниетті. Марат Сейітбекұлының қызы Әмина болашақта үлкендердің жолын жалғамақшы. Мектепті «Алтын белгіге» бітіріп, Әл-Фараби атындағы ҚазҰУ-да «математика» мамандығының мемлекеттік грант иегері атанды.
Жетісу облысы
