Жаңа диалог алаңының алғашқы жиыны Maqsut Narikbayev университетінде өтті. Сөз басында Мәжіліс спикері, «Amanat» партиясының төрағасы Ерлан Қошанов білім саласы әр кез Мемлекет басшысының назарында екенін атап өтті.
«Президентіміз педагогтер қауымына айрықша көңіл бөледі. Соның бір дәлелі Республика күні қарсаңында Мемлекет басшысы екі бірдей педагогті «Қазақстанның Еңбек Ері» атағымен марапаттады. Ел тарихында тұңғыш рет қатарынан қос ұстаз осындай жоғары марапатқа ие болды. Сондай-ақ Қасым-Жомарт Тоқаев Президент болған кезінде алғашқы қол қойған заңы да – «Педагог мәртебесі туралы» заң болғанына назар аударғым келеді. Айта кетейін, көптеген елде мұндай жеке заң жоқ. Осының бәрі – біздің қоғамда ұстаздардың мәртебесін көтерудің нақты, айқын мысалы», деді ол.
Сондай-ақ Мәжіліс спикері озат оқушыларымыздың беделді халықаралық байқаулардағы жетістіктерін атап өтті. Кейінгі жылдары еліміз Халықаралық математикалық олимпиадада 104 елдің ішінде 25-орыннан түскен емес, ал FIDE Халықаралық шахмат сайысында еліміздің әйелдер құрамасы отандық шахмат тарихында алғаш рет күміс жүлдені жеңіп алды. Мемлекет басшысы атап өткендей, зияткерлік сайыстарда жеңіске жеткен оқушыларды Олимпия ойындарының жеңімпаздары сынды ұлықтау қажет. Яғни интеллектуалды ұлт тек терең білім арқылы ғана қалыптасады.
«Бүгінде біз экономикасы дамыған, әділетті әрі табысты мемлекет құру жолындамыз. Оның негізі – прогрессивті, интеллектуалды ұлт, қуатты орта. Дәл осындай адамдарды тәрбиелеу – қазіргі мұғалімнің басты миссиясы. Ел болашағы – ұстаз қолында. Осы орайда, депутаттық корпус пен партия әрқашан қастарыңыздан табылып, барлық бастамаларыңызды қолдауға дайын», деді Ерлан Қошанов.
Сонымен қатар «Amanat» партиясы төрағасының айтуынша, күн тәртібінде өз шешімін таппай келе жатқан мәселелер де бар. Олар – үш ауысымды және апатты жағдайдағы мектеп мәселесі, мұғалімдерді аттестаттау кезіндегі күрделі процедура, сондай-ақ мектептегі қағазбастылық. Балалар мен жасөспірімдер арасындағы цифрлық тәуелділіктің артуы да үлкен алаңдаушылық туғызады. Оған қарсы күресте ата-аналар мен ұстаздар қауымының өзара бірлескен іс-әрекеті қажет.
Жиын барысында Оқу-ағарту министрі Ғани Бейсембаев кейінгі бес жылда білім жүйесі түбегейлі өзгеріске ұшырағанын атап өтті.
«Бұл қадам мұғалімдердің еңбек жағдайын жақсартуға, балаларға сапалы білім беру ортасын құруға бағытталған. Ол өз кезегінде оқыту жұмысын сапалы жүргізуге ықпал етеді. 600 мыңға жуық педагогтің еңбегі жоғары бағаланып, оларға қолдау көрсету мәселесі мемлекет саясатының басым бағыттарының біріне айналды», деді министр.
Келелі кеңесте Абай атындағы Жамбыл гуманитарлық жоғары колледжіндегі музыка пәнінің оқытушысы Забида Худатаева ерекше қажеттілігі бар тәрбиеленушілермен жұмыс істеу кезінде педагогтің қандай қиындықтарға тап болатынына назар аударды. Педагог тәрбиелеген зағип студент Айсұлу туралы оқиға барша қатысушыны тебірентті.
«Ол маған білім алуға деген ерекше ынтамен, ерік-жігермен келді. Біздің осынау ортақ жолымыз түрлі қиындыққа толы болды. Біз білім берудің жаңа әдісін әзірлеп, ерекше білім алуға деген қажеттілігі бар балаларға арналған оқу құралдарын дайындадық. Мен үшін оқушымның кедергілерді жеңіп, өз мақсатына жеткенін көруден артық бақыт жоқ», деді З.Худатаева.
Бұдан соң Ақтөбе қаласындағы жоғары политехникалық колледждің оқытушысы Дархан Шаңбаев жұмысшы мамандарын даярлау бойынша өз тәжірибесімен бөліссе, Алматыдан келген қазақ тілі мен әдебиеті пәнінің мұғалімі Гүлназ Шәми «Гаджетсіз демалыс» жобасы туралы сөз қозғады. Қарағандыдағы Абай атындағы мектеп-гимназияның директоры Жадыра Баймолдина балалар мектепте алғашқы өмір сынағынан өтіп жатқанын, сондықтан мектеп олардың екінші үйіне айналуға тиіс екенін атап өтті. Ал Орал қаласындағы тарих пәнінің мұғалімі Александр Мясников балалардың сыни ойлау қабілетін дамытудағы пікірталас қозғалысының маңызына тоқталды. Петропавлдан келген алғашқы әскери дайындық (АӘД) мұғалімі Дархан Қоспанов жастарды әскерде қызмет етуге даярлау жұмысы мектепте патриоттарды тәрбиелеуден басталады деген сенімде. Қызылорда облысы Тереңөзек ауылынан келген математика пәнінің мұғалімі Заманбек Аманбеков жас әріптестерін ауылда жұмыс істеуге шақырса, Астанадағы биология пәнінің мұғалімі Ілияс Сакимов олимпиадаға дайындық кезінде оқушыларға қалай қолдау көрсету керек екенін жеткізді.
Кездесу соңында бірқатар педагогқа кәсіби қызметіндегі еңбегі және қоғамдық жұмысқа қосқан елеулі үлесі үшін «Amanat» партиясының «Ұстаз – ұлт айнасы» арнайы төсбелгісі табысталды.
