Бұған дейін өткен әлем біріншіліктерде жалпыкомандалық есепте көш басына шығу бұйырмай келген еді. Дүбірлі додаға аттанар алдында бапкерлер: «Қыз-жігіттер сенімді ақтайтынына сенеміз, абыроймен оралуға күш саламыз», дегенді текке айтпаған екен. 6 алтын, 1 күміс, 10 қола медаль олжалаған саңлақтар сенімге селкеу түсірген жоқ.
Білікті маман Мақсат Бақтыбазаров әлем чемпионатының алдында ғана жастар құрамасының (ерлер) аға бапкері лауазымына тағайындалды. Қысқа уақыт ішінде өзінің біліктілігін таныта білді. 51 кг салмақта додаға кірген Боранбек Бексұлтан алдымен Зимбабве елінің боксшысын, екінші айналымда Молдова үмітін ығыстырып, ширек финалда Ресей боксшысын жеңді. Жартылай финалда Иран спортшысын айқын ұтып, алтын медаль жолындағы жекпе-жекте колумбиялық Джастин Мореноны шүбәсіз жеңді.
Жастар командасының капитаны, 67 кг салмақ дәрежесінде сынға түскен Төрехан Сабырхан әлем чемпионатына жақсы дайындықпен келгенін көрсетті. Алғашқы жекпе-жекте черногориялық қарсыласы айқастан бас тартып, рингке шыққан жоқ. Екінші кезеңде Ауғанстан елінің өкілін айқын басымдықпен жеңіп, бес төреші де жеңісті жерлесімізге берді. Ширек финалда өзбекстандықты, жартылай финалда Қытай боксшысын да еркін ұтты. Ал финалда кубалық Дэвид Эспиносадан басым түсіп, әлем чемпионы атанды. Доданың үздік боксшысына берілетін арнайы марапат та Төреханға бұйырды.
71 кг салмақ дәрежесінде Өнер Сейілхан келешегінен кемел үміт күттіретінін аңғартты. Беларусь, Пәкістан, Албания, Өзбекстан елдерінің боксшыларын қапы қалдырып, финалдық тартыста ресейлік Алексей Гуковты ұтты.
Еншімізге бұйырған төртінші алтын медальды 75 кг салмақ дәрежесінде сынға түскен Санжарәлі Бегалиев олжалады. Ол Румыниядан келген қарсыласын, Болгария боксшысын айқын ұтып, ширек финалда кубалықты жеңіп, жартылай финалда Польша боксшысын сүріндірді. Ал финалда өзбек Джафарбек Шахбазовты ұтты.
Ерлер сынында Диас Берікбай (48 кг), Жансері Көшербаев (57 кг), Расул Асанханов (92 кг), Аслан Еділбайұлы (92 килодан жоғары) жартылай финалда сүрініп, әлем чемпионатының қола жүлдесін місе тұтты.
Жангелді Ахметов баптайтын қыздарымыз да Будвадан толайым табыспен оралды. 50 кг салмақта Елянұр Тұрғанова Түркия, Өзбекстан, Грекия боксшыларынан басым түсіп, финалға шықты. Әлем чемпионы атағы үшін өткен тартыста Карла Пикті (бейтарап қатысушы) жеңді.
81 кг салмақта Аружан Зейноллаева ширек финалда ресейлікті, жартылай финалдық жекпе-жекте поляк боксшысын ұтты. Финалда сыралғы қарсыласы өзбек қызы Рухшона Парпиеваны жеңіп, әлем чемпионы атанды.
66 кг салмақта Түркия, Ресей елінің спортшыларын ұтып, жартылай финалда румын боксшысын 2-раундта айқын басымдықпен жеңген Ұлдана Таубайға да алтын медаль олжалайды деп зор сенім артылған еді. Өкінішке қарай, ирландиялық Кайла Дойлға есе жіберіп, күміс медальды місе тұтты.
Әнел Әбдірасылова (48 кг), Бағжан Отынбай (52 кг), Толғанай Қасымхан (60 кг), Аружан Жаңабаева (63 кг), Шұғыла Нәлібай (75 кг), Панар Сейітханқызы (+81 кг) әлем чемпионатының қола жүлдесін иеленді.
Үш жыл бұрынғы Токио, биылғы Париж жазғы Олимпия ойындарында боксшылардың құлдырауы саладағы түйткіл тым тереңдеп кеткенін аңғартқан еді. Қазақ боксында алдағы уақытта буын алмасу кезеңі айқын, әділ өтіп, жұмыс жүйелі жүзеге асуы үшін ауқымды реформалар жүргізу қажеттігі көп айтылды. Тіпті алғашқы қадамдар жасалып, нәтижесі де көріне бастады. Төрт жылдан кейін өтетін жазғы Олимпия ойындарында, яғни Лос-Анджелес (АҚШ) рингінде осы боксшылардың жолынан жүлде күтеміз.
Будвадағы әлем чемпионатында боксшыларымыз 6 алтын, 1 күміс, 10 қола медаль олжаласа, екінші сатыға жайғасқан Өзбекстан жастары 5 алтын, 5 күміс, 3 қола, үштікті түйіндеген Ресей спортшылары 3 алтын, 3 күміс, 4 қола медальды қанағат тұтты.
