Техника мамандарына сұраныс артты

Павлодар облысында мемлекеттің экономиканы ынталандыру бағытын­дағы белсенді шараларына қарамастан, жеке бизнестің жаңа жұмыс орында­рын құруға қосқан үлесі шамамен 35 пайызды құрайды. Тиісінше, бү­гінгі таңда жұмыс орындарының өсімін өнімділігі төмен салалар мен мем­ле­кет­тік сектор қамтамасыз етіп отыр­ған жайы бар.

Өңірлік жұмыспен қамтуды үй­лестіру және әлеуметтік бағдар­­ла­ма­лар басқармасынан хабарлағандай, тұрақты жұмыс орындарының ең көп саны білім саласында – 12,6 па­йыз, ауыл шаруашылығы, орман шаруа­шы­­лы­ғында – 10,4, өнеркәсіпте – 8,3 пайыз.

«Жыл сайын басқарма орта мер­зімді кезеңге (6 жылға дейін) еңбек нарығының қажеттілігін қалыптас­ты­руға қатысты жұмыс жүргізеді. Мә­се­лен, 2024 – 2029 жылдарға арналған техникалық, кәсіптік білімі бар білікті кадрларға қажеттілік облыста 56 420 ма­манды құрайды. Оның ішінде өнер­кәсіп – 17,8%, көлік және қоймалау – 14,6%, қызмет көрсету – 11,3%, экономика, бухгалтерлік іс – 9,7%, білім – 9,1%, денсаулық сақтау – 6,9%, құрылыс – 4,2%, ауыл шаруашылығы – 2,3%. Тұжырымдамаларға сәйкес 2024–2029 жылдары облыста 143,9 мың жұмыс орнын құру жоспарланған, оның 70 пайызы тұрақты жұмыс орындары болады. Жыл басынан 23,3 мың жаңа жұмыс орны құрылды, оның 16,4 мыңы – тұрақты. Бұл өткен жылдың сәйкес кезеңімен салыстырғанда бір­шама аз», дейді өңірлік жұмыспен қамту­ды үйлестіру және әлеуметтік бағдарламалар басқармасының басшысы Альмира Дисюпова.

Аймақта жұмыс күшінің саны азай­­ғаны да байқалады. Кейінгі бес жыл­да ол 1,3%-ға төмендеген. Жалпы, ең­­­бек нарығындағы жағдай тұрақ­ты, жұ­­мыс­­­сыз­дық деңгейі 4,8%-ды құ­райды.

Биыл кәсіпкерлікті қолдау мақса­тын­да халықтың әлеуметтік осал топ­тарына 644,6 млн теңге сомасы­на 442 грант берілген. Гранттар ха­лық­тың әлеуметтік осал санаттарына, бастапқы бизнесті іске асыруды жоспарлап отырған қатысушыларға өтеусіз, қай­та­рымсыз негізде таратылды. Атап айтқанда, атаулы әлеуметтік көмек алушылар, көп­ба­лалы отбасылар, асыраушысынан айырылу жағдайы бойынша әлеу­мет­тік төлем алушылар, мүгедек ба­ланы тәрбиелеп отырғандар, ең­бек­ке қарсы көрсетілімдері жоқ мүге­дектігі бар адамдар ие болды.

Мәселен, көпбалалы ананың бірі Тереңкөл ауылында «Монтессори» әдісін қолдана отырып, логопедиялық кабинет ашуға технологиялық жабдық­тар сатып алды. Бүгінде оған 13 бала келіп жүр. Сондай-ақ Кемеңгер ауылында «Дуэт» сұлулық салоны ашылды. Салонда қас, тырнақ стилисі, макияж­­­­­ ­­­суретшісі жұмыс істейді.

Атап өтерлігі, ерікті түрде қоныс аудару бағдарламасы шеңберінде биыл Павлодар облысына қандастар мен ішкі қоныс аударушыларды қабылдауға 3505 адамға квота бекітілген. Оның ішінде қандастар – 1252 адам, жұмыс күші артық өңірлерден – 2253 адам. Өңірлік квотаға қазірдің өзінде 2648 адам (591) отбасы қосылды. Көшіп келгендердің ішінде 1270 адам жұмысқа қабілетті жаста. Олардың 800-ге жуығы еңбек орындарына орналасқан. Тағы 54 адам жеке кәсіппен айналысса, 3 адам қайтарымсыз грантқа ие болған.

«Келген азаматтардың ішінде жалпы практика дәрігерлері, эпидемиолог, хирург мамандары бар. Ауылдық жерлерде қоныс аударушылардың көп­шілігі жергілікті шаруа қожалық­­та­рына механизатор, тракторшы, жүр­гізуші, түрлі аппараттардың опе­раторы, т.б. мамандықтарға жұ­мыс­­қа орналастырылды. Ішкі қоныс а­удару­­шылардың басым бөлігі Түр­­­кістан, Жетісу, Алматы облыс­­та­­рынан келіп жатыр. Бұған қоса 943 адамға қандас мәртебесі берілді. Көшіп келген­дер­дің көбі – білім, медицина, ауыл шаруашылығы, қызмет көрсету саласын­дағы мамандар», дейді А.Дисюпова.

Жауапты мекемелер кейінгі екі жылда аймағымызға қоныс аударғандардың әлеу­меттік келісімшарт талаптарын сақ­­­тауына қатысты мониторинг жүр­­­­­­­гізген. Оның аясында Аққулы, Же­ле­зин, Ақтоғай, Ертіс, Шарбақты аудан­­дарында 298 адамның қоныстану өңі­рі­нен өз бетінше шығып кеткені анық­тал­ған. Сондай-ақ 157 адамға төленген қаражатты қайтару туралы хабарламалар жіберілген.

Ерікті түрде қоныс аудару бағ­дар­лама­сындағы экономикалық ұт­қырлық сертификатын беруге өзге­ріс­­тер мен толық­тырулар енгізіліп жатыр. Сертификат алуға өтініш ке­ліп түскеннен кейін жергілікті мансап орталығының мамандары сатып алы­натын баспана құжаттары мен мәліметтерді мұқият, толық тексеру мақ­сатында нысанның орналасқан жеріне баратын болады.

Павлодар облысы