Биыл Баянауыл ауданындағы Бірлік, Құндыкөл ауылдары бағдарламаға еніп, жергілікті тұрғындар жобаның шарапатын сезінді. Аудан әкімі Ардақ Кісентаевтің айтуынша, Құндыкөл ауылында жалпы құны 422,6 млн теңгеге үш жоба іске асырылды. Ондағы мәдениет үйіне күрделі жөндеу жүргізіліп, жақында салтанатты түрде қайта ашылды. Жоба құны – 155,4 млн теңге.
«Ауыл – ел бесігі» шын мәнінде ауылдарды инфрақұрылымдық тұрғыдан түлетудің маңызды тетігіне айналып отыр. Құндыкөлдегі мәдениет үйі тұрғындарға рухани әрі демалыс орны болмақ. Жергілікті халықтың келелі мәселелері талқыланып, жастар мен ересектер кітап оқып тынығатын жайлы орын пайда болды. Одан бөлек, ауылішілік 3,5 шақырым жолға күрделі жөндеу жүргізілді. Асфальт төселген көшелер жарықтанып, ауылдың сәні кірді. 6,3 шақырым көше жарығы орнатылып, тұрғындардың қауіпсіздігі арта түсті. Сондай-ақ, Әлкей Марғұлан атындағы мектепке күрделі жөндеу жасалып, оқушылардың сапалы білім алуына жол ашты», дейді Ардақ Әнуарбекұлы.
Ауылды дамытуға бағытталған бағдарламаның жемісін Бірлік ауылының халқы да көрді. Мұнда жалпы құны 328,4 млн теңгеге екі жоба қолға алынды. Мәдениет үйіне күрделі жөндеу жүргізілсе, ауылішілік 6 шақырым жол орташа жөнделді.
Павлодар облысы,
Баянауыл ауданы
