Олимпия ойындарының бағдарламасына енбегенімен, самбо күресіне қызығушылардың қатары қалың. «Самбо федерациясы бірнеше жылдан бері ауқымды жарыстардың ұйымдастырылуына, спортшылардың әлемдік додаларға қатысуына екпін беріп келеді. Бүгінде елімізде 43 мыңнан астам адам осы күрес түрімен кәсіби шұғылданады», дейді Самбо федерациясының бас хатшысы Ерназар Бексұлтанов.
Самбо күресінен 1973 жылы Иран елінде тұңғыш рет әлем чемпионаты жалауын көтерді. Арада өткен 50 жылдың ішінде 46 рет әлемдік аламанда жалауымыз желбіреді. «Жыл сайынғы ел чемпионатынан бөлек, 2022 жылы Ақтауда Азия кубогі ұйымдастырылды. Былтыр елорда төрінде Азия чемпионаты өтті. Биылғы мамыр айында Ақтау қаласында Азия және Океания чемпионаты ұйымдастырылып, додаға 25 елден 500-ден астам балуан қатысты. Енді әлем чемпионатын жоғары деңгейде атқаруға барымызды саламыз», деді Е.Бексұлтанов. Бас хатшы келесі жылдан бастап клубтық жүйені жетілдіріп, жастар, жасөспірімдер, жеткіншектер арасында самбо күресімен шұғылданушылардың қатарын арттыруды көздеп отырғандарын айтты.
Самбо федерациясының бірінші вице-президенті Манарбек Бисекенов 19 жылдан кейін елімізге айналып келген жаһандық доданың маңызы жоғары екенін мәлім етті. «Астанада жалауы желбірейтін әлем чемпионатында 85 елден 600-ден астам балуан қатысуға өтінішін жолдады. Балуандармен қатар бапкерлер, дәрігерлер бастаған 150-ден аса маман келеді», деді М.Бисекенов.
Әлемдік доданың жалпы жүлде қоры – 311 мың АҚШ доллары. Чемпион атанған балуан – 4 мың, күміс жүлдегер – 3 мың, қола медаль еншілеген балуандар 2 мың доллар сыйақы алады. Зағип жандар үш салмақ дәрежесінде сынға түседі. Топ жарған, жүлдегер атанған балуанға 1000 АҚШ доллары мөлшерінде сыйақы беріледі.
Ұлттық құраманың бас бапкері Біржан Имаханов әлем чемпионатында белдесуге түсетін балуандар 24 қазаннан бастап қорытынды оқу-жаттығу жиынын Астана қаласында өткізгенін айта келіп: «Әлем чемпионатына елімізден 28 балуан қатысады. Ерлер додасында әлем чемпионы Серік Нұрбол, әйелдер сынында ғаламдық додада топ жарған Арайлым Әбенова, Гүлдана Әлмұханбетоваға ерекше сенім артамыз», деді. Бас бапкер елімізде өтетін чемпионаттан 2 алтын медаль олжалау міндеттемесі жүктелгенін де атап өтті.
Келесі жылы Қытайда Дүниежүзілік жекпе-жек ойындары жалауын желбіретеді. Осынау айтулы додаға қатысатын балуандардың тізімі әлем чемпионатындағы нәтижеге орай түзілмек.
