Синоптиктердің мәліметіне қарағанда, айдың алғашқы онкүндігінде ауаның температурасы 8 градусқа дейін салқындайды. «Қазгидрометтің» Солтүстік Қазақстан филиалының басшысы Гүлзат Ғазизованың айтуынша, айдың екінші онкүндігінде күндіз 2-3 градус жылымық болғанымен, түнде ауаның температурасы 9-14 градусқа дейін төмендейді. Үшінші онкүндікте тіпті минус 20-24 градустарға дейін суытады.
Кешегі қатты боранда қар молынан түсті. Қаланың көп жерінде тұрғындар қозғалысы да қиындап қалды. Таңертеңнен ышқына соққан боран тек түс қайта толастады. Құтырған жел қарды кейбір жолдар мен аулаларға қалың қылып үйіп тастады. Жылымық жерге түсіп еріген қар лезде қатып, көктайғақ болған тұстар да көп.
Түске дейін қар тазалауға шұғыл кірісіп, тұрғындардың жүріп-тұратын жолдарын аршып жатқан техникалар да көрінбеді. Жуырда ғана «Қазавтожол» мекемесінің басшылығы жол тазалауға техникаларымыз сақадай сай, барлығы 328 техника қар тазалауға дайын тұр деп мәлімдеген еді. Дегенмен қаланың біршама аудандарында, әсіресе «Солтүстік», №19 шағын аудандарда қозғалыста жүрген техника көзге түспеді. Тек коммуналдық қызметтің адамдары ғана қолдарындағы құралдарымен жолдарды ашып жүр.
Қаланың кейбір мектептерінде екінші ауысымның сабақтары қысқартылды. Үйге кеш шыққан оқушылар боран қайта тұрса үйлеріне жетуі қиын. Үйлері оқу орнынан алыс орналасқан балалар сабақтардан босатылды.
ПЕТРОПАВЛ
