ОАӨЭЫ бағдарламасы – Азия даму банкінің бастамасы, жетекші халықаралық қаржы ұйымдарымен серіктестікте жүзеге асырылады. Конференцияға Азия даму банкінің президенті Масацугу Асакава, ОАӨЭЫ институтының директоры Кабир Джуразода, Еуропалық комиссияның Таяу Шығыс, Азия және Тынық мұхиты бойынша директоры Петерис Устубс, Халықаралық валюта қорының, Дүниежүзілік банктің, Ислам даму банкінің және басқа да қаржы ұйымдарының өкілдері, сондай-ақ Оңтүстік Корея, Жапония, Өзбекстан, Қырғызстан, Әзербайжан, Грузия, Моңғолия, Пәкістан, Тәжікстан, Түрікменстан үкіметтік делегациялары қатысты.
Мемлекеттердің экономикалық және қаржылық тұрақтылық, инфрақұрылымды дамыту, сауда, энергетика, су ресурстары, декарбонизация және басқа да салалардағы өзара іс-қимылы талқыланды. Премьер-министр Олжас Бектенов бағдарламаның Орталық Азия өңірі үшін өзектілігін атап өтті. 20 жылдан астам уақыт ішінде өңірге шамамен 51 млрд доллар инвестиция салынса, оның 9 млрд доллардан астамы Қазақстандағы жобаларға бағытталған.
«Біз ортақ мақсаттарға жету үшін халықаралық қаржы ұйымдарымен және ОАӨЭЫ-ға қатысушы елдермен тығыз ынтымақтастықта жұмыс істеуді жалғастырамыз. Біз терең өңдеуге және қайта өңделген өнім үлесін арттыруға, экспорт құрылымын белсенді түрде өзгертуге және оның көлемін ұлғайтуға баса назар аудара отырып, агроөнеркәсіп кешенін дамытуға бағытталғанбыз. Сондай-ақ біз Орталық Азия мемлекеттерінің көлік қатынасы мен энергетикалық тұрақтылығын қамтамасыз ететін ауқымды инфрақұрылымдық жобаларды іске асыруға мүдделіміз. Өңір елдері мен халықаралық қаржы ұйымдарын бірлескен жобаларды жүзеге асыру үшін күш біріктіруге шақырамын», деп атап өтті О.Бектенов.
Өз кезегінде Азия даму банкінің президенті Масацугу Асакава ОАӨЭЫ басым бағыттары қатарында климаттың өзгеруіне қарсы күресте шешуші іс-қимылдар қабылдау, ерте ескерту жүйелерімен тұрақты инфрақұрылым құру, сондай-ақ цифрлық трансформацияны дамыту және инновациялар енгізу тұрғанын баса айтты. Конференцияға қатысушылар адами капиталды дамытуға және халықтың тұрмыс сапасын жақсартуға бағытталған бастамаларға назар аударды.
Жиын қорытындысы бойынша ОАӨЭЫ Климат және орнықты даму жобаларын дайындау қоры туралы келісімге қол қойылды.
