Сурет: gov.kz
Бүгінде жетісулық мәслихат депутаттары екінші жыл өңіріміздің өркендеп-өсуі үшін іргелі істер атқарып келеді. Мәселен, былтыр 4 кезекті және 8 кезектен тыс сессия өтіп, 100-ге жуық әділет органдарында тіркеуге жататын шешім қабылдаған. Былтыр облыс бюджеті 488,9 млрд теңгені құрады. Осы қаржының дені ауыл шаруашылығы саласына бөлінеді. Болашағы жоқ деп саналған елді мекендердің тамырына қан жүгіріп, спорт, медицина нысандары бой көтерді. Ауылдарға жаңа білім мекемелері салынып жатыр. Мұны бізге облыстық мәслихат төрағасы Гүлнар Тойлыбаева айтып берді.
«Ауыл – ел экономикасының негізгі локомативі. Қазір Жетісу ауылдары қайта түлеп келеді. Алғаш облыс әкімі Бейбіт Өксікбайұлымен бірлесе аудан тұрғындарымен кездесуге барғанда халық су, жер, газ, жол мәселесін жиі айтатын. Қазір азайып келеді, қариялар алғысын жаудырады. Облыс депутаттары көтерген сауалдардың дені өз шешімін тапты. Мысалы, Қоңыр ауылындағы орта мектептің маңайындағы ескі электр бағаналары адам өміріне қауіп төндіріп, жаңа мектептің сыртқы келбетіне сай келмейтін. Сол үшін «ТАТЭК» АҚ-ның басқарма төрағасы мен Қарабұлақ электр желілеріне депутаттық сауал жолдадым. Бұл мәселе бір айға жетпей өз шешімін тапты», дейді Г.Тойлыбаева.
Жоғарыда айтқан мәселеге ұқсас облыстық мәслихат депутаты Константин Нестеров те Текелі қаласы Рудничный ауылындағы тозығы жеткен электр бағаналарын ауыстыру жайында депутаттық сауал жолдаған екен. Бұл мәселе де өз шешімін тапқан. Рудничный ауылының 400 метр оқшауланған электр сымдары мен 33 дана бағана ауыстырылып, 11 дана трансформаторлық қосалқы стансаларына жөндеу жұмысы жүргізілген. Бұған қоса ауыл ішіндегі ескірген көпірді қайта салу, үйілген қоқыстарды тазалау жұмысына да халық қалаулылары мұрындық болған.
Осы ретте бір оқиға еске түседі. Бұл – Қойлық ауылдық округіндегі терапевт дәрігердің жоқтығы. 2 800 тұрғыны бар ауылдың жайы көптен бері айтылып жүрген мәселе еді. Жақында ауылға барсақ, әр бейсенбіде ауыл амбулаториясына аудан орталығынан білікті дәрігер келіп, тұрғындарды қабылдайды екен. Кезек күтіп, жолға көлік іздеп қажыған халық облыстық мәслихатқа ризашылығын білдіріп отыр.
«Баламыз ауырса, ауданға шапқылаймыз. Онда кезек күтесің, оның үстіне қалтамызда үнемі ақша болуы керек. Қазір жақсы болды. Аптасына бір рет дәрігер келіп толық тексеріп кетеді. Мал шаруасында жүргеннен кейін денсаулыққа қарайтын уақыт та болмайды. Енді газ күтіп отырған халық көп. Одан бөлек, ауыл шаруалары жайылымдық, егіндік жер алуда біраз кедергілерге тап болады. Осыны халық қалаулылары ескерсе деген ойымды айтқым келеді», дейді ауыл тұрғыны Айкүміс Ақшабай.
Қазір халықты ауылда сақтап қалуға мемлекет тарапынан түрлі жоба қолға алынып жатыр. Әсіресе жастарға ауылдан тегін тұрғын үй беріп, арнайы көтерме қаржы да үлестіреді. Көпке аян «Ауыл аманаты» бағдарламасы көптеген тұрғынның жеке шаруасын дамытуға үлкен сеп болды.
«Ауылды өрістету үшін түрлі жоба жүзеге асып жатыр. Біз барынша халықтың сұранысын қанағаттандыруға тырысамыз. Биыл депутаттар 100-ден аса тұрғынды қабылдап, 90 пайызының мәселесін шешуге жәрдемдескен. Мәселен, тұрғындар «Самал» шағын ауданында көпқабатты үйлердің ортасында орналасқан тротуар бойына жарық шамдарын орнатуды сұраған. Осы ретте облыстық мәслихат депутаты Қайрат Нұрғабылұлы небәрі бір аптаның ішінде өз қаражаты есебінен жарық бағаналарын орнатып, халық алғысына бөленді. Сондай-ақ депутат Жалғас Алтынбеков «Жаркент алғыр» құрылыс компаниясының директоры ретінде өз қаражатынан ұзындығы 1 шақырым А.Түркебаев көшесіне бағаналы жарық шамдарын орнатып берді. Бұл да болса – халыққа үлкен көмек», дейді Г.Тойлыбаева.
Ел тілегіне құлақ түріп, аманатын арқалаған депутаттарымыздың нәтижелі жұмысы аз емес. Алдағы уақытта көпшілікті толғандырып жүрген мəселелер бойынша әлі талай жұмыс атқарылады.
Жетісу облысы
