Абай облысының Жезкент кентіндегі мектеп-лицейі оқушысының жобасы ғарыштағы жерсеріктер мен ғарыш стансаларын энергиямен қамтамасыз ету мәселесін шешуге бағытталған. Нұралидің өнертабысы екі бөліктен тұрады. Бірінші бөлігі – лазер сәулесін бағыттайтын фокус жүйесі бар ғарыш кемесі, ал екінші бөлігі – лазер сәулесін электр энергиясына айналдыратын фоторезистор орнатылған құрылғы. Лазер сәулесі фоторезисторға түсіп, оны түрлендіргіш арқылы электр энергиясына айналдырады. Бұл энергия шамын жағуға немесе ұялы телефонды қуаттауға жетеді.
Жас өнертапқыш құрылғыны 10 метр қашықтықта сынап, оны жаңбыр, қар, тұман сияқты түрлі ауа райы жағдайында сынақтан өткізген. Сынақ нәтижелері өнертабыстың тұрақты әрі сенімді екенін көрсетті. «Ғарышта энергия тапшылығы мәселесі бар. Жерсеріктер мен ғарыш кемелері энергияның аздығынан істен шығуы мүмкін. Мен ғарышкерлерге көмек ретінде осы құрылғыны жасадым. Жобаны жасауға екі жылдан аса уақыт жұмсадым, қолжетімді материалдарды пайдаланып, ғарышта энергия жеткізу мүмкіндігін және ғарышта лазермен энергия жеткізу әлдеқайда тиімді болатынын дәлелдедім», дейді жас өнертапқыш.
2019 жылы Нұрали жобасын Мәскеу физика-техникалық институтының байқауында таныстырып, жоғары бағаға ие болған. Кейіннен құрылғыға қуаты мықты лазер орнатып, бағдарламалық кодын жетілдіре түскен. Жас өнертапқыш жобасын одан әрі дамытып, Байқоңырда өтетін халықаралық байқауға қатысуды жоспарлап отыр. Болашақта құрылғыға күн батареяларын қосып, оны тұрмыстық қажеттіліктерге, оның ішінде лазерлік зарядтау құрылғылары арқылы ұялы телефондарды қуаттауға қолданып көрмек.
