Фестиваль көрнекті балет әртістері мен хореографтардың басын қосқан тәжірибе мен шығармашылық жетістіктерінің алмасу алаңы болды. Салтанатты іс-шараның ашылуында Қазақ ұлттық хореография академиясының ректоры Бибігүл Нүсіпжанова, көркемдік жетекшісі, Ресейдің халық әртісі Алтынай Асылмұратова, балет әртісі және Бейжің би академиясының балет департаментінің директоры Владимир Малахов, балет жұлдызы Диана Вишнева, «Раушан гүлі мен көбелектің романы» балетінің қоюшы хореографы Василий Медведев, балет әртісі әрі Борис Эйфман би академиясының көркемдік жетекшісі Константин Матвеев, Бейжің би академиясының вице-президенті Су Яның қатысуымен өткен баспасөз мәслихатында фестиваль ұйымдастырушылары мен қонақтары жоғары хореографиялық өнер туралы шабыттандыратын әңгімелерін айтып, би академияларын дүниежүзілік деңгейде дамытудың маңыздылығын талқылады. Қонақтардың әрқайсысы әлемдік контексте хореографиялық өнердің өсуіне ықпал ететін сан алуан мәдениеттер мен білім беру мекемелері арасындағы тәжірибе алмасудың маңыздылығын да баса атап өтті. Ал қойылым режиссерлері сахна сыртындағы қызықты мәлімет, шығармашылық идеялармен, қойылымға деген көзқарастарымен және әр шығарманың ерекше ерекшеліктерімен бөлісті.
Сондай-ақ бұл кеште көрермендер Қазақ ұлттық хореография академиясының қайталанбас қойылымы — «Раушан гүлі мен көбелектің романы» балетін тамашалап, саф өнердің сұлулығынан ләззат алды. Би өнерінің аңызы Мариус Петипаның соңғы туындысына негізделіп Рикардо Дригоның музыкасына қойылған хореограф Василий Медведевтің редакциясындағы айтулы жұмыс фестивальдың жаңалығы болды. Тарихына 120 жыл толтырып отырған әйгілі туынды сонысымен де кештің айтулы оқиғасына айналды.
Фестивальдың келесі күні Қазақ ұлттық хореография академиясында әлемдік балет жұлдыздары – Мария театрының прима-балеринасы Диана Вишнева мен атақты балет әртісі әрі хореограф Владимир Малаховтың шеберлік сыныптары өтті. Әйгілі әртістердің шығармашылық тәжірибесіне негізделген тұщымды дәріс студенттерге жоғары би өнеріне тереңнен бойлауға тамаша мүмкіндік берді. Ал халықаралық серіктестердің қатысуымен өткен «Қазіргі білім беру жүйесіндегі хореографиялық мектепті дамыту перспективалары» тақырыбындағы дөңгелек үстел бүгінгі би өнерінің өзекті мәселелерін талқылады.
Балет өнерін жаңаша белеска көтерген би шеруі «Astana Ballet» сахнасында өткен Гала-кешпен қорытындыланды. Сахнаға екі беделді хореографиялық мектеп – Борис Эйфман би академиясының және Бейжің би академиясының студенттері шықты. Борис Эйфман би академиясы адам болмысының мәңгілік тақырыптары – сенім, үміт һәм махаббат туралы баяндайтын «Epiphania» бір актілі балет-спектаклін ұсынса, Бейжің би академиясы көрермендерге «Дивертисмент» бағдарламасын тарту етті. Онда Мариус Петипа мен Артур Сент-Леонның классикалық туындылары заманауи қойылымдармен біріктіріліп, хореографиялық өнердің әсемдігі мен жан-жақтылығын шебер жеткізе білді.
Иә, «Temps lié» фестивалі – бұл тек би мерекесі ғана емес, сонымен қатар тәжірибе алмасу, халықаралық байланыстар орнату әрі жаңа шығармашылық идеялармен шабыттандыруға арналған алаң ретінде де ауқымды жүк арқалады. Қорытынды кеште сахнаға көтерілген Қазақ ұлттық хореография академиясының ректоры Бибігүл Нүсіпжанова іс-шараның барлық қатысушысына ризашылығын жеткізе келе: «Осындай ауқымды және маңызды оқиғаның бір бөлігі болу – нағыз мақтаныш» деп сөз түйіндеді.
