Суретті түсірген – Ақәділ Рысмахан
«Жайлы мектеп» ұлттық жобасы аясында екі жыл ішінде өңірде бірнеше жаңа мектеп бой көтеруге тиіс болса, оның үшеуі бүгінгі күнге дейін пайдалануға берілгенін айтпай кетуге болмас. Жаңа оқу жылы басталған кезде Байзақ ауданының орталығы Сарыкемер аулында 600 оқушыға арналған су жаңа білім ордасы білім алушыларға есігін айқара ашса, бір ай бұрын облыс орталығы Тараз қаласында 1200 балаға шақталған №66 мектеп оқушыларды қабылдады.
Күні кеше еліміздегі ең ірі шағын аудан саналатын «Ұлы дала» шағын ауданындағы №67 мектеп балалар игілігі үшін пайдалануға берілді. Жергілікті атқарушы билік өкілдері келтірген дерекке сенсек, білім ошағы 1200 оқушыға арналған екен.
«Ғылым мен ілімнің қайнар бұлағы мектепте алған білімнен бастау алса керек. Сол үшін де мемлекет білім саласына айрықша назар аударып, қамқорлық көрсетіп отыр. Келешегін ойлаған кез келген мемлекет инвестицияны бірінші кезекте білім саласына салатыны белгілі. Болашақ ұрпақтың саналы, білімді болып өсуі үшін бәріміз жауаптымыз.
Мемлекет басшысы Қасым-Жомарт Тоқаевтың бастамасымен қолға алынған «Жайлы мектеп» ұлттық жобасы аясында өңірімізде бірнеше білім ошағы бой көтергенін атап өткен жөн. Бүгін міне, заманауи үлгіде жабдықталған тағы бір білім ошағы оқушыларға есігін айқара ашты. Бұған дейін іргедегі Байзақ ауданына қарасты Сарыкемер аулында, Тараз қаласындағы «Бәйтерек» шағын ауданында дәл осындай білім беру нысандары бой көтерген болатын. Бұл жұмыстың бәрі Мемлекет басшысының қолдауының арқасында іске асып жатқанын айта кеткен ләзім. Жалпы алғанда, өңірде білім саласына қолдан келгенше қолдау көрсетіле бермек», деді өңір басшысы Ербол Қарашөкеев жаңа мектептің ашылу салтанатында сөйлеген сөзінде.
Облыс әкімдігінің баспасөз қызметі келтірген дерекке сүйенсек, білім беру нысанының салынуына, құрылыс жұмысының талапқа сай сапалы жүргізілуіне «Самұрық-Қазына» акционерлік қоғамы мен «Integra Construction kz» ЖШС мұрындық болыпты.
«Бүгін «Ұлы дала» шағын ауданында мерейлі күн десек те болады. Тұрғындардың қуанышында шек жоқ. Дәл осы «Жайлы мектепті» алғашқы іргетасы қаланған күннен бастап бақылап отырдық. Жауапты азаматтардың құрылыс сапасына айрықша назар аударғаны көңіл қуантады. Төрт немерем су жаңа білім ордасының табалдырығын аттап отыр. Оқушыларға барлық жағдай қарастырылғанын айтпасқа болмас. Жергілікті тұрғындардың өтінішіне құлақ асқан билік басындағы азаматтарға айтар алғысымыз шексіз. Жаңа мектепте білім алған балалар үлкен азамат болып өсіп шықсын», дейді «Ұлы дала» шағын ауданының тұрғыны, зейнеткер Алмаш Ауғанбаева.
Жауапты мамандардың айтуынша, жаңа білім ордасы шетелдік озық технологиямен жабдықталған. Мұнда оқушылардың қауіпсіз ортада білім алуына барлық мүмкіндік қарастырылған. Мектепте білікті педагог мамандар сабақ береді.
Дерекке сенсек, жаңа ғимаратта интерактивті тақтасы бар 59 оқу кабинеті, 3 асхана, 2 спорт зал, мәжіліс залы, кітапхана, 2 лингафон, 2 компьютер кабинеті бар. Сонымен қатар 3 шеберхана, 3 зертхана, 10 коворкинг-орталық қарастырылыпты.
Жалпы алғанда, Жамбыл облысында «Жайлы мектеп» ұлттық жобасы аясында 12 мектеп салу жоспарланған. Жаңа білім ошақтарын салу арқылы алдағы жылдары үш ауысымды оқытуды, оқушы орнының тапшылығын және апатты мектептерді жою көзделіп отыр. Осы жылы өңір бойынша құрылысы басталған 36 білім беру нысанының 10-ы пайдалануға берілген. Жыл аяғына дейін тағы 5 мектептің құрылыс жұмысы аяқталады. Ал алдағы жылы 26 білім ошағының құрылыс жұмысы басталады.
Жамбыл облысы
