Скринингтік тексерулерден өту, профилактикалық екпелер алу, тағы басқа да себептермен емханаға келуі қажет азаматтардың аты-жөні, байланыс нөмірлері роботқа енгізіледі. Жасанды интеллект әр пациентке хабарласып, айқындауыш сұрақтар қою арқылы тексерулерге шақырады. Бұл жағдай операторлармен бақылауда болып, күнделікті өзектендіріліп отырады. Қабылдауға келгендер тізімнен өшіріліп, екпін басқа азаматтарға беріледі.
«Мемлекет басшысы Қасым-Жомарт Тоқаев Қазақстан халқына арнаған Жолдауында ұлт саулығын нығайту үшін кешенді жұмыстарды жүзеге асыру, денсаулық сақтау саласындағы дәрігерлік көмектің қолжетімділігі мен сапасын жақсарту, дамыту қажеттігін атап өтті. Сондай-ақ Президент цифрландыру саласында қол жеткізген жетістіктерді еселей түсу, еліміз жасанды интеллектіні кеңінен қолданатын, цифрлық технологияларды дамытып жатқан елге айналуы қажеттігін айтты. Бұл бағытта қалалық емханада жүзеге асырылып жатқан инновациялық жұмыстар аз емес. Алдағы уақытта жасанды интеллектіні ақпараттық жүйемен байланыстыру жоспарланған. Ол жүзеге асқан жағдайда, тікелей пациентпен сөйлесу арқылы оған ыңғайлы уақытқа – күнін, сағат, минутына дейін көрсетіп жазуға мүмкіндік туады. Егер пациент қабылдауға келе алмай қалған болса, жасанды интеллект автоматты түрде қайта байланысқа шығады. «Неге келе алмадыңыз?», «Сізді қайта қай күнге, қай уақытқа жазайық?» деп сұрап, дәрігер қабылдауына қайта жазады. Бұл енді алдағы уақыттың еншісіндегі жұмыстар. Қазір біз бірінші кезеңге қатысты жұмыс жүргізіп жатырмыз», дейді Түркістан қалалық емханасының басшысы Райымбек Тасырбаев.
Емханадағы жасанды интеллектінің минутына 5 мың, ал күніне 100 мың азаматқа хабарласуға қуаты жетеді екен. Бүгінге дейін 3 ай көлемінде 27 769 азаматқа қоңырау шалған. Оның ішінде 7500 азамат келісім беріп, тексеруден өткен. Ал 2929-ы қабылдауға келуден бас тартқан. Азаматтармен хабарласудың орташа ұзақтығы бір минут көлемінде. Сондай-ақ емхана басшысы медицина саласындағы ақпараттық жүйелерді ғана емес, кең тараған «Google» платформасындағы Excel кестесі тетіктерін пайдаланып жатқанын айтады.
«Дені сау ана – дені сау ұрпақ!» ұстанымын ескеретін болсақ, ең алдымен ананың жүктілікке дейінгі хал-жағдайы өте маңызды болып келеді. Осы тұрғыда әйелдердің ақпараттары конфиденциалды түрде жүргізіліп, медицина саласындағы ақпараттық жүйелерді өзара ұштастырдық. «Google Docs» бағдарламасы арқылы онлайн режімде әйелдердің, оның ішінде туу жасындағы әйелдер мен жүкті әйелдердің денсаулықтарын бақылау мүмкіншілігіміз бар. Яғни барлық әйелдің деректерін сол «Google Docs» бағдарламасына енгізгенбіз. Зертханалық, аспаптық тексерулер, бейінді мамандардың консультациялары, әйелдердің дербес ерекшеліктері туралы да ақпарат енгізіледі. Әр дәрігер, әр мейіргер қарауындағы әйелдің мәліметін базаға енгізе алады. Мәліметтің толыққандылығы, дәйектілігі бірінші орында болады. Біз оны көріп отырамыз. Бүгінге дейін қай әйел қаралды, қайсысы қаралмады деген сұрақтарға тез әрі оңай жауап ала аламыз. Сол онлайн режімдегі кесте арқылы бақылау жүргіземіз. Бұл өз кезегінде мониторинг жасауға, сыни жағдайдағы әйелдердің, ауыр жағдайда ауруханаға жеткізілетін жүкті әйелдердің санын азайтуға көмектеседі. Ана мен бала өлімінің алдын алуға мүмкіндік береді. Осылайша, жүкті әйелдердің жағдайын бақылау ең бірінші орынға қойылған», дейді емхана басшысы.
Цифрландырудағы мұндай жұмыс әзірге қалалық емханадан басқа ешбір медициналық мекемеде жоқ екен. Бұл жаңашылдық әйелдердің ауыр жағдайда перинаталдық орталықтарға түсуі, ерте босанудың азаюына алып келіп отыр.
Қалалық емханаға келуші азаматтарға медициналық қызметті пайдалану ыңғайлы әрі сапалы болуы үшін пациент маршруты барынша жеңілдетілген. Оған қоса колл-орталығы жұмыс істейді. Нәтижесінде, емханада келушілер дәрігер қабылдауын күтіп, ұзын-сонар кезекте отырмайды. Сондай-ақ аймақтық дәрігердің жүктемесін азайту мақсатында кеңейтілген практикадағы мейіргерлер жұмысы іске қосылған. Нәтижесінде, азаматтар барлық қағазбасты жұмыстарын мейіргер көмегімен тындырады. Оған қоса зертханалық, аспаптық тексерулерге жолдама сынды қызметтер де аймақтық мейіргер көмегімен орындалады, дәрігердің жүктемесі азаяды. Осылайша, аймақтық дәрігердің қабылдауын қажет ететіндер, яғни ауырып келгендер, созылмалы аурудың өршу сатысында еміне коррекция талап ететін азаматтар кедергісіз көмек ала алады.
«Емханада енгізілген жаңашылдықтардың, жүйелі жұмыстардың қаншалықты нәтижелі болғандығын өткен жылдың және биылғы жылдың 9 айындағы жалпы тәжірибелік дәрігерлер мен мейірбикелердің қабылдау санын салыстырып қарағанда аңғару қиын емес. Өткен жылдың 9 айында аймақтық дәрігерлер – 155647, мейіргерлер 5647 қызмет көрсеткен. Бұл жалпы қызметтің 3 пайызын құрайды. Биыл 9 айдың қорытындысында аймақтық дәрігерлердің еншісінде 159557 қызмет болса, мейіргерлер тарапынан көрсетілген қызмет саны 32271-ге жетті, бұл жалпы қызметтің 20 пайызын құрайды. Кейінгі үш жылдың 9 айлық көрсеткіштерін салыстыра отырып, жылдан-жылға ауру көрсеткіштерінің төмендегенін анықтай аламыз. Мысалы, бірінші инсульт жағдайлары 2022 жылы – 85, 2023 жылы – 73, 2024 жылы – 70. Ал қайталама инсульт алушылар 2022 жылы – 51, 2023 жылы – 40, 2024 жылы 38 жағдайға дейін азайған. Миокард инфарктісі 2022 жылы – 40, 2023 жылы – 38, 2024 жылы – 39 жағдай. Ал қайталама миокард инфарктісі 2022 жылы – 8, 2023 жылы – 6, 2024 жылы 5 жағдайға дейін төмендеген», дейді Р.Тасырбаев.
Емханада азаматтармен кері байланыстың қолжетімділігі үшін телеграм-бот (@turkistanpoliklinicabot) енгізілген. Онда емхана туралы барлық ақпаратты алуға болады. Халық арасында жиі қойылатын сұрақтардың жауабын алу оңайлатылған. Ботқа оңай қосылу үшін QR-кодтар қалалық емхананың барлық бөлімшелерінде қолжетімді жерлерге ілінген. Яғни кері байланыс жылдам жүргізіледі. Осы арқылы биыл 51 өтінім келіпті. Оның басым көпшілігі ақпараттық сұрақтар. Жалпы, өткен жылы 9 айда – 2, биыл 9 айда 2 арыз-шағым түскен. Емхана басшысының мәлімдеуінше, зерделеудің қорытындысында биылғы арыздың екеуі де негізсіз деп танылған.
ТҮРКІСТАН
