Петропавлда жалған ақша жасаушылар ұсталды

ПЕТРОПАВЛ. 17 маусым. Облыс орталығында 2000 теңге купюраларын қолдан жасап, пайдаланумен айналысқан қылмыстық топ құрықталды.Бұл туралы BNews.kz хабарлады. Облыстық мемлекеттік кірістер департаменті қызметкерлерінің жедел-алдын алу шаралары барысында 2000 теңгелік жалған купюраларды әзірлеген үш адам екені анықталды. «Күнібұрын келісу арқылы бір топ адамның қолдан жасалған ақша купюраларын өткізу мақсатында басып шығару оқиғасына қатысты сотқа дейінгі тексеру жұмыстары басталды.Жедел-алдын алу шарасын өткізу барысында күдікті адам сериясы БИ 3763232 болатын номиналы 2000 теңгелік купюраның 31 данасын тапсырды», деді департаменттің бас маманы Ренат Сахатов. Қылмыстық іске  тікелей қатысты  күдіктілердің бірінің  үйін тінту  кезінде DVD дискілер, флэш карта мен жүйелік блок және планшет тәркіленді. Оның айтуынша, купюралар номиналы 2000 теңгелік шынайы ақша купюрасын сканерлеп, А4 форматты қағазға түрлі-түсті принтермен басып шығару арқылы жасалған. Ақшалар Петропавл аумағында пайдаланылған. Қазір ҚР Қылмыстық Кодекстің 231-ші бабы бойынша қылмыстық іс қозғалып, тергеу амалдары жүргізілуде. Өмір Есқали. Дерек: BNews.kz Сурет: egemen.kz