Облыс орталығының біраз бөлігін жылу, жарықпен қамтамасыз етіп тұрған №3 ЖЭО-да кәсіби әрі білікті жас мамандардың шоғыры өсіп келеді. Осы орайда кәсіпорындағы тәжірибелі мамандар қатарына қосылған Дидар Төлеухановты айрықша атап өтуге болады. Жас жігіт университетті тәмамдаған соң, бірден аталған стансаға жұмысқа орналасқан. Биыл еңбек ұйымында тұрақтап қалғанына он екі жыл болыпты.
«Қарапайым ауыл баласымын, үйдегі 6 ұлдың кенжесімін. Анам жеке кәсіппен айналысса, әкем ұзақ жыл полицияда еңбек етіп, зейнетке шықты. Мектепте оқып жүрген уақытта физика саласына аса құмартқан едім. Сол себеп болды ма екен, білім ұясын тәмамдаған соң, «Электр энергетикасы» мамандығы бойынша оқу грантына ие болып, жоғары оқу орнына түстім. Отбасымызда бұл салада менен өзге ешкім жұмыс істемейді. Келіншегім – тарих пәнінің мұғалімі», дейді білікті маман.
Ол мұнда алғашында электр монтері болып қабылданып, жылдар өте инженер лауазымына сай екенін еңбегімен дәлелдеді. Қазіргі лауазымы – электр цехында жоғары вольтті сынақтар жүргізу және өлшеу жөніндегі инженер. Міндеті – күрделі және ағымдағы жөндеуден өткен кез келген өндірістік жабдықты іске қоспас бұрын сынақтан өткізу. Бұл жабдықтардың қатарына трансформаторлар, генераторлар, 6 квт кабельдік желілер енеді. Сонымен қатар металл байланыстарын, өзге де жабдықтарды тексереді.
«Еңбекте барлығы тәжірибемен келетінін жылдар өте түсіндім. Қазір үш адамнан тұратын бригада басшысымын. Маңызды жабдықтарды алдын ала тексереміз. Егер жұмысы көңілімізден шықпаса, ақауды іздейміз. Оны тапқан соң, іске жөндеу бригадасы қосылады. Биыл стансадағы үш бірдей қазандықты сынақтан өткіздік. Түтінсорғыш, электр желілерін айырғыш, кабельдік желілер, көмір уатқыш жабдықты тексеріп шықтық. Басшылар маған тәжірибелі маман ретінде сенеді. Әрине, қиын кезеңдер болды, бірақ табандылық пен кәсібіме берілгенімнің арқасында барлығын еңсере білдім. Бүгінде 6-разрядты маманмын. Кейінгі жылдары бұл саладағы тарифтердің өскенінің нәтижесін әлеуметтік тұрғыдан сезініп отырмыз. Ең әуелі біз сияқты қарапайым қызметкерлердің жалақысы ұлғайды. Қазір өз замандастарымды бұл қызметке ұялмай шақыра аламын. Себебі бұрынғыдай емес, еңбекақымыз лайықты, отбасын асырауымызға жетеді», дейді ол.
Жас маман Мемлекет басшысы Қасым-Жомарт Тоқаевтың алдағы жылды «Жұмысшы мамандықтар» жылы деп жариялағаны қуантып отырғанын жеткізді. Оның нәтижесінде энергетика саласындағы кадр тапшылығы, еңбекақы мәселесі шешіліп, маңызды өзгерістер болады деп үміттенеді.
Павлодар облысы
