Тұрмыс тұрақтылығы – бірегей міндет

Кеше жұмыс сапарымен Қарағанды облысына келген Премьер-Министрдің орынбасары Бердібек Сапарбаев Мемлекет басшының тапсырмаларынан туындайтын біршама ілкімді іс-шаралардың орнықты жүзеге асырылу үдерісіне қатысып, арнайы кеңес өткізді. Сапар барысында вице-премьер мен облыс әкімі Нұр­­мұ­хамбет Әбдібеков Ин­дус­трия­ландыру картасы ая­сында «Сарыарқа» арнайы экономи­калық аймағы аума­ғында құ­рыл­ған айналмалы кран­дар мен тығынды арматуралар шығаратын қазақстандық-германиялық бір­­лес­кен кәсіп­орын – «Бемер Ар­матура» ЖШС-інде болып, тың үрдіспен жұмыс істейтін өндіріс орнының тыныс-тіршілігімен танысты. Содан кейін осы кәсіпорында аймақтағы өнеркәсіп сала­сы­ның қуатын одан әрі дамыту, өндірістік үдерістерді тұрақ­тандыруды қамтамасыз ету және қазақстандық мазмұн үлесін арттыру секілді өзекті мәселелер бойынша кеңей­тілген кеңес өткізілді. Кеңесті ашу сәтіндегі кіріспе сөзінде облыс әкімі Н.Әбдібеков энергиялық ресурс­тар бағасының төмендеуіне байланысты өндірістік үдерістерді тұрақтандыру, жұ­мыс­кер-қыз­меткерлердің еңбек құ­қықтары мен кепілдемелерін қам­тамасыз ету мәселесі айрықша маңызды екендігін атап өтті. – Өндірістік кәсіпорындар мо­лынан орналасып, елдің аса ірі индустриялық орталығы болуы себепті Қарағанды облысы Елба­сының ерекше қадағалауында, – деді аймақ басшысы. Талқыланған тақырыпқа сай тол­ғақты әңгіме қозғаған Б.Сапар­баев өз сөзінде Президент Нұр­сұлтан Назарбаевтың Қазақстан халқына арнаған «Нұрлы Жол» – болашаққа бастар жол» атты Жолдауында алға қойылған мін­деттерді жүзеге асыруға қатысты қолға алынған пәрменді шаралар мен олардың нақты нәтижелерін тілге тиек етті. – Әлемдік деңгейде орын алып отырған геосаяси жағдайлардың алаңдатушылық тудыруы – заң­ды құбылыс. Соған орай, экономиканы қалыпты жағдайда ұстау және оны бұрынғыдан да ұтымды деңгейде ілгері бастыру, жұмыссыз азаматтардың санын мейлінше шектеу шараларын ширата түсу, ел көлеміндегі өндірістік кәсіпорындардың өзара іскерлік қарым-қатынасын мейлінше кеңейту, жергілікті өнім өндірушілерге қолдау көрсету, қазақстандық мазмұн сапасын арттыру – бүгінгі күннің басты талабы. Байыпты әрекеттердің нәтижесінде, тұрғындардың тұрмыстық әлеуеті тұрақты қалыпта болуы әрі сапасы арта түсуі тиіс. Бұл – Елбасы тарапынан Үкімет пен әр деңгейлі әкімдердің алдына қойылған бірегей міндет. Осынау мерейлі міндетті орнықты іске асыру мақсатында Үкімет арнайы іс-шаралар жоспарын белгіледі. Бүгінгі сапар – сол жоспарлы шараларды нақты қолданысқа енгізудің бастауы, – деді Б.Сапарбаев. Кеңесте аймақтың өнеркәсіп саласындағы қазір таңдағы ахуалы туралы облыс әкімінің орынбасары Әнуар Ахметжановтың есебі тыңдалды. Аталған сала бойынша облыста айтарлықтай ілгері басу бар. Мәселен, Индустрияландыру картасы бойынша 59 жоба іске қосылса, соның 46-сы жоспарлы қуатына шыққан. Ал, қалғандары 50 пайыздық деңгейді еңсеріп отыр. Салалық бағытқа басшылық жасайтын жауапты тұлғаға бір­қатар сауалдар қойған вице-пре­мьер қалыптасқан жағдайға қанағаттанушылық білдіріп, өндірісті өркендете түсуге, әсі­ресе, Индустрияландыру картасы мен Моноқалаларды дамы­ту бағдарламасы аясындағы жұмыстың пәрменділігін арт­ты­руға байланысты нақты тапсырмалар берді. Кеңес қорытындысында жалпы сомасы 57 млрд. теңгені құрайтын өзара ынтымақтастық туралы 47 меморандумға қол қойылды. Меморандумдар маңызы зор үш бағытты қамтитынын атап өткен жөн. Оның алғашқысы – облыс әкімдігі, жұмыс берушілер және кәсіподақтардың өндірістік үдерістерді тұрақтандыру, жұ­мысшы-қызметкерлердің жұ­мысқа орналасуы мен еңбек құқықтарының қамтамасыз етілуіне қатысты өзара түсіністік пен ынтымақтастығы туралы. Екіншісі – облыс әкімдігі мен ұлттық компаниялардың арасындағы жергілікті мазмұнды дамыту мәселесіне қатысты. Үшіншісі – Қарағанды облысындағы отандық өнім өндірушілер мен жүйені құрушы кәсіпорындар арасындағы жергілікті мазмұнды дамыту мәселесін тиянақтайды. Меморандумдарға қол қою­шылар арасында «Қаз­Мұ­найГаз» ҰК» АҚ, «Қазақстан темір жо­лы» ҰК» АҚ, «Қазақтелеком» АҚ, «ҚазАвтоЖол» ҰК» АҚ, «Арсе­лор­Миттал Теміртау» АҚ, «Қазақ­мыс» корпорациясы» ЖШС, «Еу­разиялық Топ» ЖШС және Қара­ғанды облысының өнім өндірушілері бар. Жиын соңында облыс әкімі: «Біз, «жұмылған жұдырықтай» болып, бірлескен қимылдың арқа­сында экономиканың айрық­ша кезеңіндегі кедергілерді еңсере­ті­німізге, халық мүддесі жолындағы жетістіктерді жүйелі етіп, саны мен сапасын арттыра түсетінімізге сенемін» десе, Б.Сапарбаев өза­ра ынтымақтастық жөніндегі мемо­рандумдарға қол қойған кәсіп­орындар басшыларына ел Үкіме­тінің атынан алғыс сезімін білдірді. – Біздің «бір жағадан бас, бір жеңнен қол» шығара отырып әрекет етуіміз, өз кезегінде, жұмыс орындарын сақтауға, тауар өндірушілерді қолдауға, тиісінше, облыс тұрғындарының әл-ауқатын арттыруға игі әсерін тигізеді, – деді вице-премьер сөз түйінінде. Ахат ҚҰРМАНСЕЙІТОВ, журналист. ҚАРАҒАНДЫ.