Батыс Қазақстандағы екі ауыл көшірілетін болды

ОРАЛ. 17 маусым. БатысҚазақстандағы «Қарашығанақ» кен орнының санитарлық қорғау аймағын ұлғайту жөніндегі шаралар белгіленді. Қазақстанның бас мемлекеттік санитарлық дәрігері Жандарбек Бекшин осындай мазмұндағы құжатқа қол қойды. Оның нақты іс-қимыл жасау уақыты 2018 жылдың 1 қаңтарына сәйкес келеді. Бұл туралы egemen.kz тілшісі хабарлады. Санитарлық қорғау аймағының өсуі №2 газды кешенді түрде өндеу орталығының қуатын жаңғырту қажеттілігінен туындады. Бұл жөніндегі Үкімет Қаулысы сәл кейін қабылданады деп күтілуде. Жаңа аймақ іске қосылған кезге дейін осы маңайдағы Бестау және Березовка ауылдарын көшіру көзделген. Оның уақыты алдағы 2017 жылдың желтоқсан айына жоспарланған. Бұл жөнінде Бөрлі ауданы әкімінің орынбасары Қайрат Өтегенов: «Аталған ауыл тұрғындарымен ертерек кездесіп, бір ұйғарымға келуді ойластырып отырмыз. Өйткені, біз үшін олардың ұсыныстарын білу өте маңызды. Алдағы көші-қон жайының барлық мәселелері осы кездесуде ортаға салынады», – деді. Осы арада 2015 жылдың 8 мамыры күні Премьер-Министрдің орынбасары Бердібек Сапарбаев Батыс Қазақстан облысының Березовка ауылында қалыптасқан күрделі жағдайға қатысты мәжіліс өткізгенін айта кеткен жөн. Онда вице-премьер «Қарашығанақ» кен орнының санитарлық қорғау аймағын ұлғайту қажеттігін, соған сай ауыл тұрғындары көшірілуі керектігін атап көрсетті. Темір Құсайын. Дерек: egemen.kz. Сурет: khabar.kz.