Спорт • 19 Желтоқсан, 2024

Жарыс күнделігі

30 рет

көрсетілді

2 мин

оқу үшін

Қарағанды қаласындағы Серік Сәпиев атындағы Боксты дамыту орталығында ересектер арасында ел біріншілігі басталды. Ерлер мен әйелдер арасындағы додаға 400-ден астам боксшы қатыспақ. Ұлттық құраманың бас бапкері Қайрат Сәтжанов Таиландта өткен Азия чемпионатында олжа салған боксшылар ел біріншілігінен босатылатынын айтты. Дегенмен де ішкі чемпионаттың бәсі жоғары болмақ. Себебі әлем чемпионы Теміртас Жүсіпов сынды сақа боксшылар қатысатын додада жастар да бағын сынамақ. Атап айтқанда, жастар арасында әлем чемпионы атанған Төрехан Сабырхан сынды саңлақтар рингке шығады. Чемпионат 24 желтоқсанда мәресіне жетеді.

Қуаныш НҰРДАНБЕКҰЛЫ

Гандболдан әйелдер құрамасы Үндістанда өткен Азия чемпионатының қола медалін иеленіп, келесі жылы Германия мен Нидерланд елдері тізе қосып өткізетін әлем біріншілігіне жолдама алды. Беларусь маманы Александр Сытько баптайтын құрама қола медаль үшін өткен тартыста Иран құрамасын 28:22 есебімен жеңді. Азия чемпионатының алтын медалі финалда Оңүстік Корея құрамасын ұтқан Жапония гандболшыларына бұйырды. Нью-Делидегі ойын 25:24 есебімен аяқталды. Біздің қыздар жартылай финалда осы Жапония құрамасына есе жіберді.

Жібек Құламбаева Үндістанның Нави-Мумбай қаласында өтіп жатқан ITF W50 турнирін сәтті бастап, алғашқы айналымда жапон теннисшісі Хироко Куватаны жеңді. Халықаралық жарыста жерлесіміз жұптық сайыста да бағын сынайды. Үндістан теннисшісі Шривалли Бахидипатимен жұптасып, Шехал Мане мен Сонал Патилге (Үндістан) қарсы кордқа шығады. Жекелей сындағы жеңісінің нәтижесінде Жібек WTA Live рейтингінде 320-сатыға орнықты.

Бүгін Біріккен Араб Әмірліктерінің Абу-Даби қаласында «World Tennis League» халықаралық турнирі басталды. 22 желтоқсанда мәресіне жететін додаға Елена Рыбакина «Falcons» командасының атынан қатысса, ерлер сайысында Александр Шевченко «Eagles» командасы құрамында кортқа шығады.