Сәуір айынан бері жүргізілген акцияға облыста 173 мыңнан астам тұрғын, 4 мыңнан астам мекеме мен кәсіпорын қатысты. 77 мыңнан астам аула, 2508 көп қабатты тұрғын үй, 74 мың жеке тұрғын үй, 300-ге жуық саябақ абаттандырылды.
– «Таза Қазақстан» акциясы тек тазарту емес, сау экологиялық сана қалыптастырудың бір қадамы. Баталы іске балаларымен бірге қатысқан ата-аналар өз елінің тазалығына қамқорлық жасап, болашақ үшін аса маңызды құндылық қалыптастырады. Көшеден басталған көрнекі іс келешекте қоршаған ортаны сақтайтын жаңа ұрпақты тәрбиелейді», дейді облыстық «Жасыл ел» жастар еңбек және құрылыс жасақтары штабының жетекшісі Қасиет Балмолда.
Экологиялық акция облыста сәуір айынан басталып, апта сайын өтті. Абаттандыру, санитарлық-тазалауды қамтитын облыстық нақтылы іс-шаралар жоспары бекітілді. Биыл өңір алапат су тасқынын бастан кешірді. Табиғи құбылыстан кейінгі өзен арналары мен аумақтарын қоқыстан тазалау мақсатында шілде, тамыз айларында «Таза жағалау» акциясы ұйымдастырылды. Қыркүйек айында «World cleanup day», бүкіләлемдік тазалық күні акциясы өтті.
– Сәуір айынан бері ұйымдастырылған санитарлық тазалық жұмыстары барысында 6 мыңнан астам тротуар жөнделді, 63 мыңнан астам түрлі ағаш көшеті егілді, 1221 әлеуметтік нысан, 1251 тарихи-мәдени ескерткіш тазартылды. Экологиялық айлыққа 1805 техника жұмылып, 61 750 тонна қоқыс шығарылды, – дейді облыстық қоғамдық даму басқармасы жастар саясаты бөлімінің бас маманы Асылай Алтайқызы.
«Ғарыш сапары» мекемесі облыс аумағынан 197 заңсыз қоқыс орнын анықтаған еді. Бүгінге дейін оның 149-ы жойылды. Қалған қоқыс орындары да тазартылады дейді мамандар.
Республикалық акцияның өңірде өту барысы туралы бұқаралық ақпарат құралдарында да үнемі жарияланып, көпшілік уақтылы хабарланып отыр. Мәселен, облыстық газет беттерінде 171 мақала, жергілікті телеарналарда 103 сюжет, интернет-ресурстарда 159 материал, әлеуметтік желілерде 1300-ден астам жазба, 130-дан астам бейнеролик дайындалған.
Қоғамдық орындарды ластап, қоршаған ортаға зиян келтірген мекеме мен адамдарды заңға тартып отыру да керек. Биылдың өзінде өңірде Әкімшілік құқық бұзушылық туралы кодекстің 434-2, 505-баптарына сәйкес 10 002 құқық бұзушылық анықталған. Нәтижесінде жауапты тұлғаларға 71 658 560 теңге көлемінде айыппұл салынды. Оның 33 065 596 теңгесі өндірілді.
Акция облыстың барлық ауданын қамтыды. Айталық, жақында ғана Жаңақала аудандық мәслихатының депутаты Бегайым Есенғалиеваның ұсынысымен №9 сайлау округінде орналасқан саябаққа 200 түп ағаш көшеті егілді. Ізгі шараға аудан басшысы Алпамыс Көшкінбаев, әкімдік қызметкерлері, ауыл тұрғындары, мұғалімдер қатысты.
«Таза Қазақстан» акциясы – келешекті көздеген бастама. Бүгін егілген терек ертеңгі ұрпағыңа сая болады, жемісін береді. Сондықтан мұндай игілікті істің соңы болмауы керек.
Батыс Қазақстан облысы
