Орта бизнестің орнықты даму бағдарламасы

Кеше Инвестициялар және даму министрі Әсет Исекешев пен Экономика министрі Ерболат Досаевтың қатысуымен «Бәйтерек» ұлттық басқарушы холдингі» АҚ-тың алғашқы отырысы өтті. Онда холдингтің орта бизнесті дамытуға арналған жаңа бағдарламасы таныстырылды. Отырысқа Үкімет мүшелері мен Ұлттық кәсіпкерлер палатасы, сондай-ақ екінші деңгейлі банктердің басшылары мен биз­нес өкілдері де қатысты. «Құрметті әріптестер бүгінгі жиын­ның мақсаты белгілі. Себе­бі, биылғы жылы бірқатар маңыз­ды бағдарламалар жүзеге асырыла бастайды. Бірінші кезекте, әрине, Елбасының «Нұрлы Жол» бағдар­ламасы екені аян. Сондай-ақ, ин­дус­трияландырудың екінші бес­жылдығына орай жасалған бағ­дар­ламалар іске қосылады. Солардың ішінде шағын және орта бизнес­ке Елбасымыз үлкен мән беріп отырғанын бәріңіз білесіздер. Осы тұрғыдан қарағанда бүгін талқылауға түскелі отырған жаңа бағдарламаның дұрыс жасалуы өте маңызды. Қазір Үкіметте кә­сіпкерлікті қолдау шаралары күн тәртібінде деуге болады. Ондағы мақсат, бизнестің тиімділігін арттырып, ел экономикасын көтеру екені түсінікті», деді Ә.Исекешев. Орта бизнесті қолдауға арналған «Бәйтерек» холдингі ұсынып отырған жаңа бағдарлама, еліміздің шикізаттық емес секторында бәсекеге қабілетті, экс­портқа бағытталған аймақтық және әлемдік деңгейдегі кә­сіп­орындар шоғырын қалып­тас­тыруды көздейді. Жоспарға сай, бағдарламаның алғашқы кезеңі сынақ түрінде жүзеге асырылады екен. «Біз компания­ларды дамытуға, шикізаттық емес экспортты өсіруге, өнер­кә­сіптік өндірісті арттырып, кәсіпорындарға жоғары табыс­ты жұмыс орындарын құру­ға көмектесуді көздейміз. Ал­ғаш­қы кезеңде негізінен үш салаға басымдық беріледі. Олар агроөнеркәсіп кешені, маши­на жасау және құрылыс мате­риал­дарының өндірісі. Ал енді бағдарламаға қандай компания­лар қатыса алады? Нақты көр­сетер болсақ, активтері 2 млрд. теңгеден асатын, соңғы үш жылда тұрақты дамыған, осы уақытта бір рет болсын өнімін экспортқа шығарған және кемінде 200 жұмыс орны бар кәсіпорындар қатысу мүмкіндігіне ие болады. Ал сапалық талаптарға келсек, менеджмент, стратегия, бизнес үлгінің әлеуеті ба­ғаланады. Бұйыртса, алғаш­қы жылдардың нәти­жесіне қарай бағдарламаның ауқымы кеңейіп, оған бір­қатар өзгеріс енгізу жоспарда бар», деді бағдарламаны таныстырған Қ.Бишімбаев. Сөз болған бағдарлама аясында қарастырылған қол­дау шаралары үш ба­ғыттан тұрады. Бірінші бағыт бойынша, «Бәйтерек» холдингі компаниялар то­бының құралдарын пайдалану арқылы қаржылық қолдау көрсету – тікелей несиелендіру, банкаралық не­сиелеу, лизингтік мәм­лелерді қаржыландыру, пай­ыздық үстемелерді суб­сидиялау, несиелерді кепіл­дендіру, экспорттық сақ­тандыру, экспортқа шығарар алдындағы қаржыландыру мен сауда операцияларын қаржыландыру, инно­ва­цияға гранттар бөлу көз­делген. Екінші бағыт бой­ынша консалтингтік көмек көрсетіледі. Бағ­дар­ламаға қатысушы компаниялар басқару саласы бойынша әлемдік озық тәжірибелермен танысып, нақты көмектер алу мүм­кіндігіне ие болады. Қажет болған жағдайда мамандарды арнайы оқыту да қолға алынады. Ал, үшінші бағыт – мемлекеттік органдармен арадағы жұмысты жолға қою. Бағдарлама аясында компаниялардың жұмысына қатысты мәселелерді шешіп, әкімшілік кедергілерге жол бермеу үшін мемлекеттік органдармен тығыз қарым-қатынас орнату көзделіпті. Отырыста таратылған баспасөз мәліметіне қара­ған­да, жыл басынан бері «Бәйтерек» холдингі мен Ұлттық кәсіпкерлер палатасы, әкімшілік өкілдері еліміздің тоғыз өңірінде болып, бағдарламаны түсіндіру үшін 1,5 мың кәсіпкермен кездесулер өткізіпті. Қазіргі таңда бағдарламаға қатысуға 200-ден астам кәсіпкер өтініш беріпті. Нұрбай ЕЛМҰРАТОВ, «Егемен Қазақстан».