Қазіргі уақытта Лу Бань шеберханасында 400-ге жуық студент пен магистрант «Көлік, көлік техникасы және технологиялар», «Тасымалдауды, қозғалысты ұйымдастыру және көлікті пайдалану» бағдарламалары бойынша білім алып жатыр. Сондай-ақ «Көліктік машина жасаудағы смарт технологиялар мен жасанды интеллект» жаңа инновациялық білім беру бағдарламасымен «Ақпараттық технологиялар» мамандығы бойынша оқу тобы құрылды. Бұған 24 студент қабылданды.
Лу Бань шеберханасы халықаралық жоба аясында 2023 және 2024 жылдары 15 оқытушы, магистрант және ШҚТУ инженерлері Қытайда Тяньцзинь кәсіби институтында интеллектуалды желілік автокөліктер, электромобильдер қызметі және автокөліктердегі SMART технологияларды зерттеу бойынша тәжірибеден өтіп келген. Студенттерге өндіріс кәсіпорындарында заманауи жабдықты пайдалана отырып, оқыту мүмкіндігі берілді.
– Шеберхананың ашылуы жоғары білікті мамандарды көлік саласында даярлауды едәуір толықтырады. Лу Бань шеберханасының арқасында біздің университетімізде көлік саласындағы алдыңғы қатарлы смарт-технологиялар мен электрлік және гибридті көліктердің жаңа конструкцияларымен танысу мүмкіндігі пайда болды. Мұндағы білім беру моделі «EPIP» стандарттар жүйесіне негізделген, оның принциптері «CDIO» стандарттар жүйесімен үндеседі. Сондықтан Лу Бань шеберханасының білім беру моделі Қазақстандағы техникалық білім беру саласындағы жаңа кезең, – деді Д.Серікбаев атындағы техникалық университеттің басқарма төрағасы, ректор Сәуле Жәдігерқызы.
Шеберханада білімдерін шыңдаған студенттер жоғары сұранысқа ие. Әсіресе бизнес өкілдері қызығушылық танытқан. Мәселен, оқуы орын «Astana Motors», «Allur Auto» сынды кәсіпорындармен шарт жасасып, студенттер дуальды оқытуға көшкен. Сөйтіп, олар тәжірибесін жетілдіре жүріп, тұрақты жұмысқа орналасады. Үздіктер қатарынан көрінген студенттер ШҚТУ магистратурасы мен докторантурасында оқуын жалғастыруға және ғылыми зерттеулер мен тәжірибелік-конструкторлық жұмыстар жүргізуге бағытталған.
Қазіргі уақытта Лу Бань цехының құрылысы екінші кезеңге өткендігіне қарасақ, даму үстінде. Бағдарламалау, смарт құрылғыларды жобалау, қозғалыс қауіпсіздігі смарт-технологиялары және автономды ұшқышсыз аппараттар технологиялары сияқты өзекті дағдыларға бағытталған жаңа курстар енгізіліпті. Студенттер қызығушылық танытқандықтан, олардың қатары болашақта көбейе түсері анық. Қазіргі уақытта Нигерия, Моңғолия, Ресей және Белоруссия сынды мемлекеттерден келіп, білім алып жүргендер де бар.
Шетел демекші, Лу Бань шеберханасының жалғасы ретінде Д.Серікбаев атындағы Шығыс Қазақстан техникалық университеті мен Тяньцзинь кәсіби институты арасында жасалған келісім негізінде «SMART Driving Technology» автомобильдік интеллектуалды технологияларын қолдану және жетілдіру жөніндегі Қазақстандық инженерлік орталық құрылып жатыр. «SMART Driving Technology» нысанын салу бойынша жұмыс қолға алынған. Ал Қытайдың серіктестері 6 электромобиль береді. Сөйтіп, шеберхана аз уақыт ішінде жоғары білікті мамандардың дамуына ықпал ететін тәжірибе мен білім алмасудың көпіріне айналады.
Қосымша айта кетерлігі, Лу Бань шеберханасы Қазақстанда «EPIP» (Engineering Practice Innovation Project) стандарттарына сәйкес инженерлерді даярлайтын сертификатталған орталық. Бұл студенттерге тек техникалық салаларда жаңа білім алу ғана емес, сонымен қатар машина жасау, ақпараттық технологиялар, электротехника және басқа да салаларда озық жұмыс әдістерін меңгеруге мүмкіндік береді.
Жоғарыда аталған бірлескен бағдарламалар еліміздегі оқу стандарттарын жақсартуға, Қытайда қолданылып жүрген жаңа әдістемелер мен технологияларды енгізуге ықпал етуі мүмкін. Оқу-орын басшылығының айтуынша, Лу Бань шеберханасы тек білім саласында ғана емес, дипломатиялық деңгейде де әлеуетке ие. Қазақстан мен Қытай арасындағы достық қарым-қатынастарды нығайтуда маңызды рөл атқарады.
Өскемен
