Облыстық төтенше жағдайлар департаментінің мамандары мен ел ішіндегі еріктілер өрт қауіпсіздігі ережелерін елдің есіне салғанымен, қарапайым талаптарды мейлінше дұрыс сақтамаудың салдарынан айтып келген апаттың сейілер түрі көрінбейді.
– Жылу беру маусымы басталғалы өрт қауіпсіздігі ережелері бұзылады, – дейді Ақмола облысы төтенше жағдайлар департаментінің мемлекеттік өрт бақылау басқармасы басшысының орынбасары Ержан Ғаббас, – мұндай 49 жағдай тіркелді. Электр құрылғыларын монтаждау, техникалық пайдалану ережелерін бұзған 75 дерек анықталды. Жеті жағдайда үй иелері от жаққан кезде қауіпті аңғармай, опық жеген.
Алдын алу жұмыстары жүргізіліп-ақ жатыр. Маусым басталғалы 9 000 отбасының үйлеріне назар аударылған. Бұл үйлер – әлеуметтік жағынан аз қамтамасыз етілгендердің баспаналары. Шамамен бір жарым мыңдай пештің мұржасы ыстан тазартылып, сонша үйге өрт қаупі болған жағдайда дабыл қағатын құрылғы орнатылған. Әлі де 1400 отбасына осындай құрылғы орнату межеленген. Бұл істің айта қаларлықтай пайдасы бар. Мәселен, дабыл қаққыштың арқасында Біржан сал ауданында екі қарт адам ажал аузынан аман қалған. Соңғы кезде алты ауданда құрылғының іске қосылуы себепті 30 адамның өмірі сақталған.
Алда – жаңа жыл. Қауіпсіздік ережелерін күшейтпесе болмайды. Әсіресе балаларға абай болу керек. «Өрт – тілсіз жау» екенін әркез естен шығармаған жөн.
Ақмола облысы
