Көпшілік күткен қуанышты сәт еді. Себебі кітапхана ғимараты пайдалануға берілгелі қырық жыл өтсе де, жөндеу көрмеген. Енді міне, ажарланып, толған айдай толықсып, жаңарған. Игілікті істің аясында Қазақстанның халық жазушысы Сәкен Жүнісовтің туғанына 90 жыл толуына орай «Серілердің соңғысы» тақырыбында ғылыми-тәжірибелік конференция ұйымдастырылды. Жаңарған ғимараттың қос қанатында Сәкен Жүнісов пен жазушы-драматург, ақын Төлеген Қажыбаев атындағы мәжіліс залы мен музей кабинетінің лентасы қиылды.
– Ұлы Мағжанның қос қанатында ойлы оқырманнан оң бағасын алған екі ағамыз тұрса, жараспай ма? Бұл біздің өңірде бұрын-соңды болмаған жаңалық, – дейді кітапхана директоры, ақын Қуаныш Оспан.
Төлеген Қажыбаев атындағы музей-кабинет көзі қарақты оқырманның көзайымына айналары сөзсіз. Кабинетке ақыннан қалған жәдігерлері, қыруар қолжазбасы, тырнақалды туындысынан бастап, ең соңғы романына дейін қойылған екен. Жеке заттары, жылдар бойы жинаған кітаптары, ордендері мен медальдары, өзге де марапаттары, көзге соншалықты ыстық көрінетін фотосуреттер де бар.
«Заманымыздың заңғар жазушысы Әбіш Кекілбаев айтқандай, «Адамды адам еткен – кітап, адамзат еткен – кітапхана» деді құттықтау сөзінде жазушы-драматург Жабал Ерғалиев. Сәкен сері рухы тәуелсіз суреткер еді ғой. Елдің сөзін, мұңы мен зарын айтып кетті. Халқына қалтқысыз қызмет еткен қаламгерге қандай құрмет көрсетсек те лайықты.
Құрқылтайдың ұясындай жып-жылы, жап-жарық, құрылысшының қалағынан жаңа шыққандай жарқыраған кітапханада танымдық іс-шара ұйымдастырылып, әдебиетке ынтық елге телегей теңіз рухани күш-қуат сыйлады.
Көкшетау
