Жас талап жақында ғана пернетақтаны көзбен басқаруға болатын жаңашыл жүйе ойлап тапты. Аталған технология көздің қозғалысын бақылап, арнайы камера мен жасанды интеллект алгоритмдерін қолданады. Яғни қажетті әріпті таңдау үшін пайдаланушы тек көзін пернетақтаның белгіленген аймағына бағыттап, кірпік қағуы жеткілікті. Бұл – әсіресе қолынан айырылған немесе маторикасы дамымаған жандарға таптырмас көмек.
«Мен бұл жобаны жасақтағанда, алдымен қоғамға пайдасы тиетін қарапайым әрі тиімді шешім іздедім. Көзбен басқару жүйесі арқылы адамдар ешқандай физикалық қозғалыссыз компьютермен еркін жұмыс істей алады. Дәл осы технология тек елімізде ғана емес, бүкіл әлемде ерекше сұранысқа ие болады деп ойлаймын. Өйткені оның көмегімен миллиондаған адамның өмірі жеңілдейді. Алдағы уақытта жобаны дамытып, түрлі стартап байқауларға қатысуды жоспарлап отырмыз. Мақсатым – ел ғылымының дамуына өз үлесімді қосу. IT саласына қызығушылығым мені үнемі дамуға ұмтылдырады, жаңа технологиялардың соңғы жаңалықтарын қалт жібермей қадағалап отырамын. Ұстаздарымның бағыт-бағдары, ата-анамның қолдауы арманыма жетуіме қанаттандырады», дейді Даир.
Айта кетейік, талабымен танылған кейіпкеріміздің бұл өнертабысы Алматыда өткен байқаудан үздік шыққан. Даир бұған дейін көз жанарынан айрылған жандарға арнап ақылды таяқ пен брайль әліпбиіне негізделген пернетақтаны да ойлап тапқан еді. Бұл құрылғыларды мүмкіндігі шектеулі жандардың өздері сынақтан өткізіп, өте қажет дүние екенін айтқан.
