Тойдың үлкені «Қазақ газеттері» шаңырағындағы «Казахстанская правда», «Ақ желкен», «Ұлан», «Мысль», «Ана тілі» басылымдарында өтпек. Осыдан 100 жыл бұрын, яғни 1925 жылы қазіргі «Ақ желкеннің» алғашқы саны, сол кездегі Қазақ автономиялық республикасының астанасы Орынборда «Пионер» деген атаумен жарық көрген болатын. Әдебиет алыптарының қаламының ізі қалған басылым бір ғасыр уақыт ішінде ұлт руханиятының дамуына өлшеусіз үлес қосып келеді.
Соның ішінде ақын Фариза Оңғарсынова басқарған кезеңінің орны бөлек.
2025 жылы қазақ жұртшылығы «Ұлан» газетінің 95 жылдығын да атап өтеді. Алғашында «Жас Алаш» газетінің қосымшасы ретінде жарық көрген басылым 1930 жылдың 5 қарашасында өз алдына жеке отау тігіп, балалардың сүйікті газетіне айналды. Осылайша, «Ұлан» 95 жыл бойы қазақтың болашақ қаламгерлерінің қаламын ұштап келеді.
Сондай-ақ 1990 жылдың 22 наурызында қазақ тілінің құтханасына айналған «Ана тілі» газетінің алғашқы саны оқырманға жол тартқаны белгілі. Яғни ұлт басылымының 35 жылдық мерейтойы да табалдырығымызды аттады.
Биыл Қазақстанның орыс тілді журналистикасында да атаулы мерекелер аз емес. Биыл бұқара «Мысль» журналы мен «Казахстанская правда» газеттерінің де 105 жылдығын тойлайды.
«Қазақ газеттері» атты бір шаңырақтың астында біріккен жоғарыдағы тарихи басылымдардың бәрін ««Egemen Qazaqstan» ұжымы мерейтойларымен шын жүректен құттықтайды. Сонымен бірге 2025 жылы 25 жылдық мерейтойын атап өтіп жатқан балаларға арналған «Айгөлек» журналы мен «Қазақ үні» газеттеріне де шығармашылық табыс тілейміз!
