Суретті түсірген – Валерий Бугаев
Қоғамдық көліктер жақын күндері «Таксомотор» ЖШС қызмет көрсететін 003 бағыты бойынша қала көшелеріне шығып, қозғалыс аралығы 10 минуттан 8 минутқа дейін қысқарады деп күтіліп отыр. 57 орындық жаңа автобустар мүмкіндігі шектеулі жандардың мініп-түсуі үшін жиналмалы аппарельмен жабдықталған. Жолаушыларға ыңғайлы болу үшін салқындатқыш, гаджеттерді қосуға арналған USB-порттар бар, сондай-ақ салонға 7 бейнекамера орнатылған.
Мерекеге орай «Ertis» футбол клубына жайлы автобус сыйға тартылды. Оған «№1 автобус паркі» ЖШС демеушілік көрсеткен. 43 жолаушыға арналған «Yutong» маркалы автобустың шалқаймалы орындықтары және аяққа арналған жастықтары бар.
«Келер жылы «Ertis» футбол клубына 60 жыл толады. Аты аңызға айналған команданың мерейтойы қарсаңында бұл лайықты сыйлық. Біздің даңқты клубты жандандыруға көмектескен, сүйікті командамызға әлі де қолдау көрсетіп жатқан жандарға алғысымды айтамын», деп атап өтті өңір басшысы Асайын Байханов.
Былтыр біздің ойыншылар екінші лиганың чемпионы атанып, маусымды бірінші лигаға шығумен аяқтағаны мақтануға тұрарлық. Ендігі міндет – Премьер-лигаға оралу.
ПАВЛОДАР
